நியூயார்க்: அமெரிக்க ஓபன் டென்னிஸ் தொடரில் முதல் நிலை வீரரான இத்தாலியின் ஜன்னிக் சின்னர் 4-வது சுற்றுக்கு முன்னேறினார்.
அமெரிக்காவின் நியூயார்க் நகரில் நடைபெற்று வரும் இந்தத் தொடரில் ஆடவர் ஒற்றையர் பிரிவு 3-வது சுற்றில்முதல் நிலை வீரரான இத்தாலியின் ஜன்னிக் சின்னர், ஆஸ்திரேலியாவின் கிறிஸ்டோபர் ஓ’கான்னெல்லுடன் மோதினார். இதில் ஜன்னிக் சின்னர் 6-1, 6-4, 6-2 என்ற நேர் செட் கணக்கில் வெற்றி பெற்று 4வது சுற்றுக்கு முன்னேறினார். 14-ம் நிலை வீரரான அமெரிக்காவின் டாமி பால் 6-7 (5-7), 6-3, 6-1, 7-6 (7-3) என்ற செட் கணக்கில் கனடாவின் கேப்ரியல் டயலோவையும், 5-ம் நிலை வீரரானரஷ்யாவின் டேனியல் மேத்வதேவ் 6-3, 6-4, 6-3 என்ற செட் கணக்கில் 31-ம் நிலை வீரரான இத்தாலியின் ஃபிளாவியோ கோபோலியையும் வீழ்த்தினர்.
25-ம் நிலை வீரரான கிரேட் பிரிட்டனின் ஜாக் டிராப்பர் 6-3, 6-4, 6-2 என்ற செட் கணக்கில் நெதர்லாந்தின் போட்டிக் வான் டி சான்ட்ஸ்கல்பையும், 10-ம் நிலை வீரரான ஆஸ்திரியாவின் அலெக்ஸ் டி மினார் 6-3, 6-7 (4-7), 6-0, 6-0 என்ற செட் கணக்கில் கிரேட் பிரிட்டனின் டேனியல் இவான்ஸையும், ஆஸ்திரேலியாவின் ஜோர்டான் தாம்சன் 7-5, 6-2, 7-6 (7-5) என்ற செட் கணக்கில் 30-ம் நிலை வீரரான இத்தாலியின் மேட்டியோ அர்னால்டியையும் வீழ்த்தி 4-வது சுற்றுக்கு முன்னேறினர்.
மகளிருக்கான ஒற்றையர் பிரிவு 3-வது சுற்றில் முதல் நிலை வீராங்கனையான போலந்தின் இகா ஸ்வியாடெக் 6-4, 6-2 என்ற செட் கணக்கில் 25-ம் நிலை வீராங்கனையான ரஷ்யாவின் அனஸ்டசியா பாவ்லிசென்கோவாவையும், 5-ம் நிலை வீராங்கனையான இத்தாலியின் ஜாஸ்மின் பவோலினி 6-3, 6-4 என்ற செட் கணக்கில் 30-ம் நிலை வீராங்கனையான கஜகஸ்தானின் யுலியா புதின்சேவாவையும் வீழ்த்தி 4வது சுற்றுக்கு முன்றினர்.
6-ம் நிலை வீராங்கனையான அமெரிக்காவின் ஜெசிகா பெகுலா 6 -3, 6-3 என்ற செட் கணக்கில் ஸ்பெயினின் ஜெசிகா பவுஸாஸையும், 16-ம் நிலை வீராங்கனையான ரஷ்யாவின் லியுட்மிலா சம்சோனா 6 -1, 6-1 என்ற செட் கணக்கில் அமெரிக்காவின் அஷ்லின் க்ருகரையும், 18-ம் நிலை வீராங்கனையான ரஷ்யாவின் டயானா ஷினைடர் 6-2, 6-2 என்ற செட் கணக்கில்இத்தாலியின் சாரா எர்ரானியையும், டென்மார்க்கின் கரோலின் வோஸ்னியாக்கி 6-3, 6-2 என்ற செட் கணக்கில் பிரான்ஸின் ஜெசிகா பொன் ஷெட்டையும் தோற்கடித்து 4-வது சுற்றில் நுழைந்தனர்.
கால் இறுதியில் போபண்ணா ஜோடி: அமெரிக்க ஓபன் டென்னிஸ் தொடரில் கலப்பு இரட்டையர் பிரிவில் இந்தியாவின் ரோகன் போபண்ணா, இந்தோனேஷியாவின் அல்டிலா சுட்ஜியாதி ஜோடி 2-வது சுற்றில் ஆஸ்திரேலியாவின் ஜான் பியர்ஸ், செக் குடியரசின் கேத்ரினா சினியகோவா ஜோடியை எதிர்கொண்டது. இதில் போபண்ணா, அல்டிலா ஜோடி 0-6, 7-6(7-5), 10-7 என்ற செட் கணக்கில் வெற்றி கால் இறுதி சுற்றுக்கு முன்னேறியது. கால் இறுதி சுற்றில் போபண்ணா, சுட்ஜியாதி ஜோடியானது ஆஸ்திரேலியாவின் மேத்யூ எப்டன், செக்குடியரசின் பார்போரா ஸ்டிரைகோவா ஜோடியை எதிர்கொள்கிறது.