பாரிஸ்: ஒலிம்பிக் வில்வித்தை போட்டியில் கலப்பு இரட்டையர் பிரிவில் இந்தியாவின் அங்கிதா பகத் - தீரஜ் பொம்மதேவாரா ஜோடி வெண்கல பதக்க போட்டியில் அமெரிக்காவிடம் 2-6 என்ற கணக்கில் தோல்வியடைந்தது.
வெள்ளிக்கிழமை நடைபெற்ற காலிறுதிக்கு முந்தைய சுற்றில் இந்தியாவின் அங்கிதா - தீரஜ் இணை, இந்தோனேஷியாவின் தியானந்தா - ஆரிஃப் ஜோடியுடன் பலப்பரீட்சை நடத்தியது. இதில் இந்திய ஜோடி 5-1 என்ற கணக்கில் (37-36, 38-38, 38-37) இந்தோனேஷிய ஜோடியை வீழ்த்தி காலிறுதிக்கு முன்னேறியது. அதன்பின், காலிறுதி ஆட்டத்தில் ஸ்பெயினின் எலியா கேனல்ஸ் மற்றும் பாப்லோ அச்சா ஜோடியை இந்திய இணை எதிர்கொண்டது.
முதல் செட்டை 38-37 என கைப்பற்றிய இந்திய இணை, இரண்டாவது செட்டை 38-38 என சமன் செய்தது. மூன்றாவது செட்டில் 37-36 என்ற கணக்கில் இந்திய ஜோடி ஆதிக்கம் செலுத்தியது. பின்னர், இந்தியாவின் அங்கிதா - தீரஜ் ஜோடி 5-3 என்ற கணக்கில் ஸ்பெயின் ஜோடியை வீழ்த்தி அரையிறுதிக்கு தகுதிபெற்றது.
அரையிறுதியில் தென்கொரியாவை எதிர்கொண்டது இந்திய இணை. தென்கொரியாவுக்கு எதிரான ஆட்டத்தின் முதல் செட்டில் 38-36 என்ற கணக்கில் இந்தியா முன்னிலைப் பெற்றது. இரண்டாவது செட்டில் 38-35 என்ற கணக்கில் தென் கொரியா வெற்றி பெற்றது. மூன்றாவது செட்டில் 38-36, 4-வது செட்டில் 39-38 என்ற கணக்கில் தென் கொரியாவின் கையே ஓங்கி இருந்தது. இதனால் 2-6 என்ற கணக்கில் தென் கொரியாவிடம் அரையிறுதியில் இந்திய ஜோடி தோல்வியைத் தழுவியது.
» முதல் ஒருநாள்: இந்தியாவுக்கு 231 ரன்களை இலக்காக நிர்ணயித்தது இலங்கை
» ஒலிம்பிக்கில் மனு பாகர் 3-வது பதக்கத்துக்கு ‘குறி’ - இறுதிப் போட்டிக்கு முன்னேற்றம்!
தொடர்ந்து வெண்கலப் பதக்கத்துக்கான ஆட்டத்தில் இந்திய ஜோடி அமெரிக்காவின் கேசி காஃப்ஹோல்ட் மற்றும் பிராடி எலிசன் ஜோடியை எதிர்கொண்டது. இதில் அமெரிக்க இணை தொடர்ந்து ஆதிக்கம் செலுத்தி வந்தது. இதில் 2-6 என்ற கணக்கில் இந்தியா தோல்வியடைந்து வெண்கல பதக்க வாய்ப்பை தவறவிட்டது.