RCB vs GT | ஆர்சிபி ஹாட்ரிக் வெற்றி: குஜராத்தை வீழ்த்தி 7-வது இடத்துக்கு முன்னேற்றம்

பெங்களூரு: நடப்பு ஐபிஎல் சீசனின் 52-வது லீக் போட்டியில் ராயல் சேலஞ்சர்ஸ் பெங்களூரு மற்றும் குஜராத் டைட்டன்ஸ் அணிகள் விளையாடின. இதில் 4 விக்கெட்டுகளில் வெற்றி பெற்றது ஆர்சிபி. அந்த அணிக்கு ஹாட்ரிக் வெற்றியாக இது அமைந்துள்ளது. இதன் மூலம் புள்ளிகள் பட்டியலில் 7-வது இடத்துக்கு அந்த அணி முன்னேறியுள்ளது.

பெங்களூருவில் உள்ள சின்னசாமி கிரிக்கெட் மைதானத்தில் இந்தப் போட்டி நடைபெற்றது. இதில் முதலில் பேட் செய்த குஜராத் அணி 19.3 ஓவர்களில் 147 ரன்களுக்கு ஆல் அவுட் ஆனது.

அந்த அணியின் பேட்ஸ்மேன்களில் ஷாருக்கான் 37 ரன்கள், தெவாட்டியா 35 ரன்கள், மில்லர் 30 ரன்கள் எடுத்தனர். மற்ற அனைவரும் சொற்ப ரன்களில் ஆட்டமிழந்தனர்.

சிராஜ், யஷ் தயாள் மற்றும் விஜய்குமார் வைஷாக் ஆகியோர் தலா 2 விக்கெட்டுகளை வீழ்த்தினர். கிரீன் மற்றும் கரண் சர்மா ஆகியரோ 1 விக்கெட் வீழ்த்தி இருந்தனர். 148 ரன்கள் எடுத்தால் வெற்றி என்ற இலக்கை ஆர்சிபி விரட்டியது.

தொடக்கம் முதலே அதிரடியாக ஆடியது ஆர்சிபி. அந்த அணியின் கேப்டன் டூப்ளசி, 23 பந்துகளில் 64 ரன்கள் குவித்து ஆட்டமிழந்தார். அதன் பின்னர் வில் ஜேக்ஸ், பட்டிதார், மேக்ஸ்வெல், கிரீன் ஆகியோர் பெரிய ஷாட் ஆட முயன்று ஆட்டமிழந்தனர். கோலி, 27 பந்துகளில் 42 ரன்கள் எடுத்த நிலையில் அவுட் ஆனார். இதனால் ஆர்சிபி இலக்கை வெற்றிகரமாக கடக்குமா என்ற சந்தேகம் எழுந்தது.

இக்கட்டான அந்த நேரத்தில் தினேஷ் கார்த்திக் மற்றும் ஸ்வப்னில் சிங் இணைந்து 35 ரன்கள் பார்ட்னர்ஷிப் அமைத்தனர். 13.4 ஓவர்கள் முடிவில் 6 விக்கெட்டுகள் இழப்புக்கு 152 ரன்கள் எடுத்தது ஆர்சிபி. தினேஷ் கார்த்திக் 21 ரன்கள் எடுத்தார். ஸ்வப்னில் 15 ரன்கள் எடுத்திருந்தார்.

இந்த வெற்றியின் மூலம் புள்ளிகள் பட்டியலில் கடைசி இடத்தில் இருந்து ஏழாவது இடத்துக்கு ராயல் சேலஞ்சர்ஸ் பெங்களூரு அணி முன்னேறியுள்ளது. அந்த அணி 11 போட்டிகளில் மொத்தமாக 4 வெற்றிகளுடன் 8 புள்ளிகளை பெற்றுள்ளது. மும்பை இந்தியன்ஸ் கடைசி இடத்துக்கு தள்ளப்பட்டுள்ளது.