சென்னையில் இன்று முதல் அகில இந்திய அஞ்சல் ஹாக்கி போட்டி

சென்னை: தமிழ்நாடு அஞ்சல் வட்டம் சார்பில், 35-வது அனைத்து இந்திய அஞ்சல் ஹாக்கி போட்டி பிப்ரவரி12-ம் தேதி (இன்று) தொடங்கிவரும் 16-ம் தேதி வரை சென்னையில் நடைபெறவுள்ளது.

இதுகுறித்து, தமிழ்நாடு வட்ட முதன்மை அஞ்சல் துறை தலைவர் ஸ்ரீதேவி சென்னையில் நேற்று செய்தியாளர்களிடம் கூறியதாவது: 35-வது ஹாக்கி போட்டிகள், சென்னை எழும்பூரில் உள்ள மேயர் ராதாகிருஷ்ணன் ஹாக்கி மைதானத்தில் பிப்ரவரி 12-ம் தேதி (இன்று) தொடங்குகிறது. தொடக்க விழாவில், சென்னை மாநகராட்சி ஆணையர் ராதாகிருஷ்ணன், ஹாக்கி ஒலிம்பிக் வீரர் ஆடம் ஆண்டனி சின்கிளேர் ஆகியோர் பங்கேற்கின்றனர்.

இப்போட்டியில், இந்தியாவில் உள்ள பல்வேறு அஞ்சல் வட்டங்களை சேர்ந்த 80 விளையாட்டு வீரர்கள் அடங்கிய 5 அணிகள் பங்கேற்கின்றன.

தமிழ்நாடு, கர்நாடகா, ஒடிசா, மத்திய பிரதேசம், பஞ்சாப் ஆகிய 5 அணிகள் இடையே 10 லீக் ஆட்டங்கள் நடைபெறும். இறுதி போட்டி வரும் 16- ம் தேதி நடைபெறவுள்ளது. மாலை நடைபெறும் நிறைவு விழாவில் டெல்லியில் உள்ள இந்திய அஞ்சல்துறையின் இயக்குனர் ஜெனரல் ஸ்மிதா குமார், இந்திய ஹாக்கி அணியின் முன்னாள் கேப்டன் ரியாஸ் நபி முகம்மது ஆகியோர் பங்கேற்கவுள்ளனர். இவ்வாறு அவர் கூறினார்.