சென்னை கிராண்ட் மாஸ்டர்ஸ் செஸ் | சாம்பியன் பட்டம் வென்றார் டி.குகேஷ்; அர்ஜுன் எரிகைசிக்கு 2-வது இடம்

சென்னை: தமிழ்நாடு விளையாட்டு மேம்பாட்டு ஆணையம் சார்பில் ‘சென்னை கிராண்ட் மாஸ்டர்ஸ் செஸ்’ சாம்பியன்ஷிப் சென்னையில் நடைபெற்று வந்தது. கடந்த 15-ம் தேதி தொடங்கிய இந்தத் தொடரின் கடைசி மற்றும் 7-வது சுற்று ஆட்டம் நேற்று நடைபெற்றன. இதில் இந்திய கிராண்ட் மாஸ்டரான டி.குகேஷ், சகநாட்டைச் சேர்ந்த மற்றொரு கிராண்ட் மாஸ்டரான ஹரிகிருஷ்ணாவை எதிர்த்து விளையாடினார். கருப்பு நிற காய்களுடன் விளையாடிய குகேஷ் 31-வது நகர்த்தலின் போது டிரா செய்தார்.

மற்றொரு இந்திய கிராண்ட் மாஸ்டரான அர்ஜுன் எரிகைசி, ஹங்கேரியின் சனான் சுகிரோவுடன் மோதினார். வெள்ளை நிற காய்களுடன் விளையாடிய அர்ஜுன் எரிகைசி 57-வது நகர்த்தலின் போது வெற்றி பெற்றார். உக்ரைனின் பாவெல் எல்ஜனோவ், அமெரிக்காவின் லெவோன் அரோனியன் மோதிய ஆட்டம் டிரா ஆனது.

ஈரானின் பர்ஹாம் மக்சூட்லூ, செர்பியாவின் அலெக்சாண்டர் ப்ரெட்கேவை வீழ்த்தினார். இந்த ஆட்டத்தில் பர்ஹாம் மக்சூட்லூ 22-வது காய் நகர்த்தலின் போது வெற்றி பெற்றார். 7 சுற்றுகளின் முடிவில் டி.குகேஷ், அர்ஜுன் எரிகைசி ஆகியார் தலா 4.5 புள்ளிகளுடன் முதலிடத்தில் இருந்தனர். இதைத் தொடர்ந்து டைபிரேக்கரில் குகேஷ் வெற்றி பெற்று சாம்பியன் பட்டம் வென்றார். அர்ஜுன் எரிகைசி 2-வது இடத்தையும், ஹரிகிருஷ்ணா 4 புள்ளிகளுடன் 3-வது இடத்தையும் பிடித்தனர்.

பாவெல் எல்ஜனோவ் (4 புள்ளிகள்), லெவோன் அரோனியன் (3.5 புள்ளிகள்), பர்ஹாம் மக்சூட்லூ (3.5புள்ளிகள்), சனான் சுகிரோவ் (2.5 புள்ளிகள்), அலெக்சாண்டர் ப்ரெட்கே (1.5 புள்ளிகள்) ஆகியோர் 4 முதல் 8-வது இடங்களுடன் தொடரை நிறைவு செய்தனர்.

15 லட்சம் பரிசு: சாம்பியன் பட்டம் வென்ற குகேஷுக்கு ரூ.15 லட்சம் பரிசுத்தொகை வழங்கப்பட்டது. 2-வது இடத்தை பிடித்த அர்ஜுன் எரிகைசிக்குரூ.10 லட்சமும், 3-வது இடம் பெற்ற ஹரி கிருஷ்ணாவுக்கு ரூ.8 லட்சமும் வழங்கப்பட்டது. சென்னை கிராண்ட் மாஸ்டர்ஸ் செஸ் தொடரில் சாம்பியன் பட்டம் வென்ற குகேஷ், ஃபிடே சர்க்யூட் தரவரிசையில் முதலிடத்தை பிடித்தார். மேலும் கேண்டிடேட்ஸ் தொடருக்கு தகுதி பெறுவதற்கான வாய்ப்பையும் அதிகரித்துக்கொண்டார்.