ஒருநாள் கிரிக்கெட் அணியில் கிளென் மேக்ஸ்வெல் இல்லை: ஆஸி. அதிர்ச்சி முடிவு

டெஸ்ட் போட்டி அணியிலேயே இருந்திருக்க வேண்டும் என்று பலரும் கருத்து கூறி வந்த நிலையில் இங்கிலாந்துக்கு எதிராக ஜனவரி 14-ல் மெல்போர்னில் தொடங்கும் 5 போட்டிகள் கொண்ட ஒருநாள் தொடருக்கு அதிரடி வீரர் கிளென் மேக்ஸ்வெலை ஆஸ்திரேலியா தேர்வு செய்யாமல் அதிர்ச்சியளித்துள்ளது.

அதே போல் மேத்யூ வேடும் அணியில் தேர்வு செய்யப்படவில்லை, கேப்டன் ஸ்மித்தின் செல்ல நண்பர் டிம் பெய்ன் விக்கெட் கீப்பராகத் தேர்வு செய்யப்பட்டுள்ளார், டி20 அதிரடி வீரர் கிறிச் லின் ஒருநாள் தொடர் அணியில் சேர்க்கப்பட்டுள்ளார். மிட்செல் ஸ்டார்க், ஹேசில்வுட், பாட் கமின்ஸ் ஆகியோர் அணியில் சேர்க்கப்பட்டுள்ளனர்.

அணித்தேர்வுக்குழு தலைவர் டிரவர் ஹான்ஸ் கூறும்போது, “கிளென் மேக்ஸ்வெல் திறமை குறித்து யாருக்கும் சந்தேகம் எதுவும் இல்லை, ஆனால் அவர் சீராக ரன்களை எடுப்பதில்லை. இந்த வடிவத்தில் கடைசி 20 போட்டிகளில் மேக்ஸ்வெலின் சராசரி 22 மட்டுமே. கிறிஸ் லின் உள்நாட்டு கிரிக்கெட்டில் பிறருக்கு அச்சமூட்டும் ஒரு வீரராக திகழ்கிறார் அதனால் அவருக்கு வாய்ப்பு கொடுக்காமல் இருக்க முடியாது.

அதே போல் டிம் பெய்ன் தன்னைத்தானே தேர்வு செய்து கொண்ட வீரராகிறார், ஆஷஸ் தொடரில் பெய்ன் தன்னை நிரூபித்துள்ளார்” என்றார்.

ஆஸ்திரேலிய ஒருநாள் தொடர் அணி:

ஸ்மித் (கேப்டன்), வார்னர், ஏரோன் பிஞ்ச், கமின்ஸ், ஹேசில்வுட், டிராவிஸ் ஹெட், கிறிஸ் லின், மிட்செல் மார்ஷ், டிம் பெய்ன், ரிச்சர்ட்சன், மிட்செல் ஸ்டார்க், மார்கஸ் ஸ்டாய்னிஸ், ஆண்ட்ரூ டை, ஆடம் ஸாம்ப்பா.