சென்னை: சென்னையில் இன்று நடைபெற இருந்த கேலோ இந்தியா இளைஞர் விளையாட்டு போட்டிகளுக்கான தமிழக அணியில் இடம் பெறுவதற்கான தேர்வு தொடர் மழை காரணமாக ஒத்திவைக்கப்பட்டுள்ளது.
கேலோ இந்தியா இளைஞர் விளையாட்டு போட்டி வரும் 2024-ம் ஆண்டு ஜனவரி 19 முதல் 31-ம் தேதி வரை தமிழகத்தில் உள்ள சென்னை, கோவை, மதுரை, திருச்சி ஆகிய நகரங்களில் நடைபெற உள்ளது. இதில் நாடு முழுவதில் இருந்து 5 ஆயிரத்துக்கும் மேற்பட்ட வீரர், வீராங்கனைகள் பங்கேற்கவுள்ளனர்.
இந்த போட்டியில் தமிழக அணிகள் சார்பில் இடம்பெறுவதற்கான வீரர்,வீராங்கனைகள் தேர்வுகள் சென்னையில் இன்று முதல் (நவம்பர் 30-ம் தேதி) டிசம்பர் 2-ம் தேதி வரை நடைபெறும் என ஏற்கெனவே அறிவிக்கப்பட்டு இருந்தது. இந்நிலையில் சென்னையில் பெய்து வரும் தொடர் மழைகாரணமாக வீரர், வீராங்கனைகள் தேர்வு ஒத்திவைக்கப்பட்டுள்ளதாகவும் மாற்று தேதி பின்னர் அறிவிக்கப்படும் எனவும் தமிழ்நாடு விளையாட்டு மேம்பாட்டு ஆணையம் நேற்று அறிவித்துள்ளது.