WI vs IND | சூர்யா - திலக் வர்மாவின் அபார ஆட்டம்: 3வது டி20 போட்டியில் இந்திய அணி வெற்றி

கயானா: மேற்கு இந்தியத் தீவு அணிக்கு எதிரான 3வது டி20 போட்டியில் இந்திய கிரிக்கெட் அணி 7 விக்கெட் வித்தியாசத்தில் வெற்றிபெற்றுள்ளது.

இருஅணிகளும் 5 ஆட்டங்கள் கொண்ட டி20 கிரிக்கெட் தொடரில் விளையாடி வருகின்றன. இதன் முதல் இரு ஆட்டங்களிலும் மேற்கு இந்தியத் தீவுகள் வெற்றி பெற்றது. அந்த அணி டிரினிடாட்டில் நடைபெற்ற முதல் ஆட்டத்தில் 4 ரன்கள் வித்தியாசத்திலும், கயானாவில் நடைபெற்ற 2-வது ஆட்டத்தில் 2 விக்கெட்கள் வித்தியாசத்திலும் இந்திய அணியை வீழ்த்தி இருந்தது.

இந்நிலையில், 3-வது ஆட்டம் கயானாவில் இன்று இரவு 8 மணிக்கு நடைபெற்றது. டாஸ் வென்ற மேற்கு இந்தியத் தீவு அணி பேட்டிங் தேர்வு செய்தது. அதன்படி, முதலில் ஆடிய அந்த அணி 20 ஓவரில் 5 விக்கெட்டுக்கு 159 ரன்கள் எடுத்தது. ஓப்பனிங் பேட்ஸ்மேன் பிராண்டன் கிங் 42 ரன்கள் எடுத்தார். அதிரடியாக ஆடிய கேப்டன் ரோவ்மென் பாவெல் 19 பந்தில் 40 ரன்கள் குவித்தார். இந்தியா சார்பில் அதிகபட்சமாக குல்தீப் யாதவ் 3 விக்கெட் வீழ்த்தினார்.

இதன்பின் 160 ரன்கள் எடுத்தால் வெற்றி என்ற இலக்குடன் களமிறங்கிய இந்திய அணிக்கு ஓப்பனிங் பேட்ஸ்மேன்கள் ஜெய்ஸ்வால் ஒரு ரன்னிலும், ஷுப்மன் கில் 6 ரன்னிலும் அவுட்டாகி அதிர்ச்சி அளித்தனர். ஒருகட்டத்தில் இந்தியா 34 ரன்களுக்கு 2 விக்கெட் இழந்து திணறிய நிலையில் சூர்யகுமார் யாதவ் - திலக் வர்மா கூட்டணி அமைத்து சரிவில் இருந்து அணியை மீட்டெடுத்தனர்.

தொடக்கம் முதலே அதிரடியாக ஆடிய சூர்யகுமார் யாதவ், சிக்சர், பவுண்டரிகளாக விளாசியதுடன், 44 பந்தில் 4 சிக்சர், 10 பவுண்டரிகள் உள்பட 83 ரன்கள் குவித்து ஆட்டமிழந்தார். சூர்யகுமார் யாதவ் - திலக் வர்மா ஜோடி 87 ரன்கள் சேர்த்தது. இதன்பின், கேப்டன் ஹர்திக் பாண்ட்யா, திலக் வர்மாவுடன் இணைந்து அணியை வெற்றிப்பாதைக்கு அழைத்துச் சென்றார்.

இதனால், இந்தியா 7 விக்கெட் வித்தியாசத்தில் 164 ரன்கள் எடுத்து அபார வெற்றி பெற்றது. திலக் வர்மா 49 ரன்களும், பாண்ட்யா 20 ரன்களும் எடுத்து ஆட்டமிழக்காமல் இருந்தனர்.