மார்ச்சில் முத்தரப்பு டி20 தொடர்

70-வது ஆண்டு சுதந்திர தின கொண்டாட்டத்தை முன்னிட்டு இலங்கை கிரிக்கெட் வாரியம் 3 நாடுகள் பங்கேற்கும் டி20 தொடரை நடத்த திட்டமிட்டுள்ளது. இதில் இலங்கையுடன் வங்கதேசம், இந்தியா அணிகள் கலந்து கொள்கின்றன. இந்தத் தொடர் அடுத்த ஆண்டு மார்ச் 8-ம் தேதி முதல் 20-ம் தேதி வரை கொழும்பில் உள்ள பிரேமதாசா மைதானத்தில் நடைபெறும் என இலங்கை கிரிக்கெட் வாரியம் நேற்று அதிகாரப்பூர்வமாக அறிவித்துள்ளது. இறுதிப் போட்டியையும் சேர்த்து மொத்தம் 7 ஆட்டங்கள் நடைபெறுகின்றன. இதன்படி ஒவ்வொரு அணியும் மற்ற அணிகளுடன் தலா இருமுறை நேருக்கு நேர் மோதும். புள்ளிகள் அடிப்படையில் முதல் இரு இடங்களை பிடிக்கும் அணிகள் இறுதிப் போட்டியில் பலப்பரீட்சை நடத்தும்.