ஜூனியர் துப்பாக்கி சுடுதலில் இந்தியாவுக்கு 2-வது இடம்: 6 தங்கம், 6 வெள்ளியுடன் 17 பதக்கம் பெற்றது

புதுடெல்லி: கொரியாவில் உள்ள சாங்வான் நகரில் ஜூனியர் உலக சாம்பியன்ஷிப் துப்பாக்கி சுடுதல் போட்டி நடைபெற்று வந்தது. இதன் கடைசி நாளான நேற்று ஆடவருக்கான 50 மீட்டர் பிஸ்டல் பிரிவில் இந்தியாவின் கமல்ஜீத் 544 புள்ளிகள் குவித்து தங்கப் பதக்கம் வென்றார். உஸ்பெகிஸ்தானின் வெனியமின் நிகிடின் 542 புள்ளிகளுடன் வெள்ளிப் பதக்கமும், கொரியாவின் கிம் தமின் 541 புள்ளிகளுடன் வெண்கலப் பதக்கமும் பெற்றனர்.

50 மீட்டர் பிஸ்டல் ஆடவருக்கான அணிகள் பிரிவில் கமல்ஜீத், அன்கைத் தோமர்,சந்தீப் பிஷ்னோய் ஆகியோரை உள்ளடக்கிய இந்திய அணி 1,617 புள்ளிகள் குவித்து தங்கப் பதக்கம் வென்றது.

உஸ்பெகிஸ் தான் அணி 1,613 புள்ளிகளுடன் வெள்ளிப் பதக்கமும், கொரியா அணி 1,600 புள்ளிகளுடன் வெண்கலப் பதக்கமும் பெற்றன. மகளிருக்கான 50 மீட்டர் பிஸ்டல் பிரிவில் இந்தியாவின் டியானா 519 புள்ளிகளுடன் வெள்ளிப் பதக்கம் வென்றார்.

இந்த தொடரை இந்திய அணி 6 தங்கம், 6 வெள்ளி, 5 வெண்கலம் என 17 பதக்கங்கள் பெற்று 2-வது இடத்துடன் நிறைவு செய்தது. சீனா 12 தங்கம் உட்பட 28 பதக்கங்கள் பெற்று முதலிடம் பிடித்தது.