சென்னை லயன்ஸ் - புனேரி பல்தான்: ஜூலை 13-ல் மோதல்

மும்பை: அல்டிமேட் டேபிள் டென்னிஸ் (யுடிடி) 4-வது சீசனுக்கான அட்டவணை நேற்று அறிவிக்கப்பட்டது. இதன்படி தொடக்க ஆட்டத்தில் நடப்பு சாம்பியனான சென்னை லயன்ஸ், புனேரி பல்தான் அணியை ஜூலை 13-ம் தேதி எதிர்கொள்கிறது.

அரையிறுதி மற்றும் இறுதிப் போட்டிகள் உட்பட மொத்தம் 18 ஆட்டங்கள் இந்த சீசனில் நடைபெறுகின்றன. 6 அணிகள் கலந்து கொள்ளும் இந்த தொடரின் ஆட்டங்கள் இரவு 7.30 மணிக்கு தொடங்கும். போட்டிகள் ஸ்போர்ட்ஸ் 18 மற்றும் ஜியோசினிமாவில் நேரடியாக ஒளிபரப்பப்படும். அரையிறுதிப் போட்டிகள் ஜூலை 28 மற்றும் 29-ம் தேதிகளிலும், இறுதிப் போட்டி ஜூலை 30-ம் தேதியும் நடைபெறுகின்றன.

பெங்களூரு ஸ்மாஷர்ஸ், தபாங் டெல்லி டிடிசி, கோவா சேலஞ்சர்ஸ் மற்றும் யு மும்பா டிடி ஆகியவை இந்தத் தொடரில் கலந்து கொண்டு பட்டம் வெல்ல போராடும் மற்ற நான்கு அணிகள் ஆகும்.

யுடிடி சீசன் 4-ல் இந்திய நட்சத்திரங்களான அச்சந்தா ஷரத் கமல், மனிகா பத்ரா, சத்தியன் ஞானசேகரன் ஆகியோருடன் நைஜீரியாவின் குவாட்ரி அருணா (உலக தரவரிசை 16) மற்றும் அமெரிக்காவின் லில்லி ஜாங் (உலக தரவரிசை 24) உள்ளிட்ட உலகின் முன்னணி நட்சத்திரங்களும் பங்கேற்கின்றனர்.