உலகக் கோப்பை கிரிக்கெட் தகுதி சுற்று இன்று தொடக்கம்

ஹராரே: ஐசிசி 50 ஓவர் கிரிக்கெட் உலகக் கோப்பை தொடருக்கான தகுதி சுற்று ஜிம்பாப்வேயில் இன்று தொடங்குகிறது. இதன் தொடக்க ஆட்டத்தில் ஜிம்பாப்வே - நேபாளம் அணிகள் பகல் 12.30 மணிக்கு மோதுகின்றன.

ஐசிசி 50 ஓவர் கிரிக்கெட் உலகக் கோப்பை தொடர் வரும் அக்டோபர்-செப்டம்பர் மாதங்களில் இந்தியாவில் நடைபெற உள்ளது. 10 அணிகள் கலந்து கொள்கின்றன. இதில் தரவரிசை அடிப்படையில் போட்டியை நடத்தும் இந்தியா, நடப்பு சாம்பியன் இங்கிலாந்து, ஆஸ்திரேலியா, நியூஸிலாந்து, பாகிஸ்தான், வங்கதேசம், ஆப்கானிஸ்தான், தென் ஆப்பிரிக்கா ஆகிய 8 அணிகள் நேரடியாக கலந்து கொள்கின்றன. மீதமுள்ள 2 அணிகளை தேர்வு செய்வதற்கான தகுதி சுற்று ஜிம்பாப்வேயில் இன்று தொடங்குகிறது.

இதில் நெதர்லாந்து, நேபாளம், அமெரிக்கா, மேற்கிந்தியத் தீவுகள், ஜிம்பாப்வே, அயர்லாந்து, ஓமன், ஸ்காட்லாந்து, இலங்கை, ஐக்கிய அரபு அமீரகம் ஆகிய 10 அணிகள் கலந்துகொள்கின்றன.

இவை இரு பிரிவுகளாக பிரிக்கப்பட்டுள்ளன. லீக் சுற்றின் முடிவில் இரு பிரிவிலும் முதல் 3 இடங்களை பிடிக்கும் தலா 3 அணிகள் சூப்பர் 6 சுற்றுக்கு முன்னேறும். இதில் முதல் இரு இடங்களை பிடிக்கும் அணிகள் உலகக் கோப்பை கிரிக்கெட் தொடரின் பிரதான சுற்றுக்கு தகுதி பெறும்.