இலங்கை அணிக்கு எதிரான முதல் ஒருநாள் போட்டியில் பாகிஸ்தான் அணி அசத்தல் வெற்றி

இலங்கை அணிக்கு எதிரான முதல் ஒருநாள் போட்டியில் பாகிஸ்தான் அணி 83 ரன்கள் வித்தியாசத்தில் வெற்றி பெற்றது.

துபையில் நேற்று முன்தினம் நடைபெற்ற இந்த ஆட்டத்தில் முதலில் பேட் செய்த பாகிஸ்தான் அணி 50 ஓவர்களில் 6 விக்கெட்கள் இழப்புக்கு 292 ரன்கள் குவித்தது. பாபர் அசாம் 131 பந்துகளில், 5 பவுண்டரிகளுடன் 103 ரன்கள் விளாசினார். கடைசி கட்டத்தில் அதிரடியாக விளையாடிய மூத்த வீரரான ஷோயிப் மாலிக் 61 பந்துகளில், 4 பவுண்டரிகள், 2 சிக்ஸர்களுடன் 81 ரன்கள் சேர்த்து வலுவான இலக்கை அமைக்க உதவினார். இலங்கை அணி தரப்பில் சுரங்கா லக்மல் 2 விக்கெட்கள் கைப்பற்றினார்.

293 ரன்கள் இலக்குடன் பேட் செய்த இலங்கை அணி 67 ரன்களை சேர்ப்பதற்குள் 5 விக்கெட்களை பறிகொடுத்தது. நிரோஷன் திக்வெலா 19, கேப்டன் உபுல் தரங்கா 18, தினேஷ் சந்திமால் 4, மெண்டிஸ் 2, ஸ்ரீவர்தனா 0 ரன்களில் ஆட்டமிழந்தனர். இதன் பின்னர் அந்த அணியால் சரிவில் இருந்து மீள முடியாமல் போனது. சிறிது நேரம் தாக்குப் பிடித்து விளையாடிய திஷாரா பெரேரா 21, லகிரு திரிமானே 53 ரன்கள் சேர்த்த நிலையில் ஆட்டமிழந்தனர்.

32.1 ஓவரில் 132 ரன்களுக்கு 7 விக்கெட்களை இழந்த இலங்கை அணி தோல்வி பாதையில் பயணிக்க தொடங்கியது. 8-வது விக்கெட்டுக்கு இணைந்த அகிலா தனஞ்ஜெயா, வாண்டர்சே ஜோடி சிறிது நேரம் போக்கு காட்டியது. இதனால் பாகிஸ்தான் அணியின் வெற்றி தாமதம் ஆனது. 48-வது ஓவரில் வாண்டர்சே 25 ரன்கள் எடுத்த நிலையில் ஹசன் அலி பந்தில் வெளியேறினார். இந்த ஜோடி 8-வது விக்கெட்டுக்கு 68 ரன்கள் சேர்த்தது.

50 ஓவர்கள் முடிவில் இலங்கை அணி 8 விக்கெட்கள் இழப்புக்கு 209 ரன்கள் சேர்த்தது. தனஞ்ஜெயா 50 ரன்களுடன் ஆட்டமிழக்காமல் இருந்தார். பாகிஸ்தான் தரப்பில் ருமான் ரயீஸ், ஹசன் அலி ஆகியோர் தலா 3 விக்கெட்கள் வீழ்த்தினர். ஆட்ட நாயகனாக ஷோயிப் மாலிக் தேர்வானார். 83 ரன்கள் வித்தியாசத்தில் வெற்றி பெற்ற பாகிஸ்தான் அணி 5 ஆட்டங்கள் கொண்ட ஒருநாள் போட்டித் தொடரில் 1-0 என முன்னிலை வகிக்கிறது.