ஸ்ரீ ராமநவமி விழா: கும்பகோணம் ராமசாமி கோயிலில் தேரோட்டம் கோலாகலம்

கும்பகோணம்: கும்பகோணம் ராமசாமி கோயிலில் ஸ்ரீராம நவமியையொட்டி திருத்தேரோட்டம் கோலாகலமாக நடைபெற்றது.

கும்பகோணம் ராமசாமி கோயில் தென்னகத்தின் அயோத்தி என்றழைக்கப்படுகிறது. இக்கோயிலில் ஆண்டுதோறும் ராமநவமி விழா வெகு விமரிசையாக கொண்டாடப்படுவது வழக்கம்.

நிகழாண்டு கடந்த 22-ம் தேதி கொடியேற்றம் நடைபெற்றது. இதனைத் தொடர்ந்து பல்வேறு வாகனங்களில் சுவாமி வீதியுலா நடைபெற்றது. இன்று ஸ்ரீ ராமநவமியான அதிகாலை 4.15 மணிக்கு மேல் 5.15 மணிக்குள் சுவாமி திருத்தேருக்கு எழுந்தருளலும், காலை 8 மணிக்கு திருத்தேரோட்டமும் நடைபெற்றது. தேரில் சீதா ராமர் லெட்சுமணர் சிறப்பலங்காரத்தில் பக்தர்களுக்கு காட்சியளித்தனர்.

ராமா ராமா என முழக்கமிட்டபடி பக்தர்கள் தேரின் வடம் பிடித்து இழுத்துச் சென்றனர். தொடர்ந்து இரவு 8 மணிக்கு தீர்த்தவாரி நடைபெறும். 31-ம் தேதி காலை திருமஞ்சனமும், மாலை புஷ்பகயாகமும், த்வாதச ஆராதனமும், இரவு சப்தாவர்ணமும், ஏப்ரல் 1-ம் தேதி காலை ராஜ உபசார திருமஞ்சனமும், ஸ்ரீ ராமபிரானும், சீதையும் திருக்கல்யாண சேவையில் புஷ்பக விமானத்தில் வீதியுலா புறப்பாடும் நடைபெறுகிறது.

இதற்கான ஏற்பாடுகளைக் கோயில் செயல் அலுவலர் சி.மகேந்திரன் மற்றும் பணியாளர்கள் செய்து வருகின்றனர்.