கும்பகோணத்திலிருந்து 2-வது வாராமாக 5 வைணவ கோயில்களுக்கு ஆன்மிக பயணம்

கும்பகோணம்: அறநிலையத் துறை மற்றும் சுற்றுலாத்துறை சார்பில் கும்பகோணம் பகுதியில் உள்ள 5 வைணவ கோயில்களுக்கான 2-வது கட்ட ஆன்மிக பயணம் இன்று தொடங்கப்பட்டது.

புரட்டாசி சனிக்கிழமைகளில் கும்பகோணம் பகுதியில் உள்ள 5 வைணவ கோயில்களுக்கு பக்தர்கள் ஆன்மிக பயணம் அழைத்துச் செல்லப்படுவார்கள் என இந்து சமய அறநிலையத் துறை சார்பில் அறிவிக்கப்பட்டது. அதன்படி, புரட்டாசி 2-வது சனிக்கிழமையான இன்று கும்பகோணம் சாரங்கபாணி, சக்கரபாணி கோயில்கள், திருச்சேறை சாரநாத பெருமாள் கோயில், ஒப்பிலியப்பன் கோயில் வெங்கடாசலபதி கோயில், நாச்சியார்கோவில் சீனிவாசப்பெருமாள் கோயில் ஆகிய 5 வைணவ கோயில்களுக்கு 3 வாகனங்களில் 37 பக்தர்கள் இன்று ஆன்மிக பயணம் அழைத்துச் செல்லப்பட்டனர்.

கும்பகோணம் சாரங்கபாணி கோயிலில் நடைபெற்ற நிகழ்ச்சியில் அறநிலையத்துறை உதவி ஆணையர் சாந்தா ஆன்மிக பயணத்தைத் தொடங்கி வைத்து, பக்தர்களுக்கு 2 பைகளில் தண்ணீர் பாட்டில் உள்ளிட்ட பிரசாதங்களை வழங்கினார். செயல் அலுவலர் எஸ்.சிவசங்கரி, மாவட்ட சுற்றுலா அலுவலர் ஆ.சங்கர் மற்றும் பலர் இதில் கலந்து கொண்டனர்.

இதைத் தொடர்ந்து அக்.5-ம் தேதி மற்றும் அக்.12-ம் தேதிகளிலும் விண்ணப்பம் செய்துள்ள பக்தர்களில் தேர்ந்தெடுக்கப்பட்டவர்கள் 5 வைணவ கோயில்களுக்கு அழைத்துச் செல்லப்படுவர். இவர்களுக்கான உணவு உள்ளிட்டவை சாரங்காபாணி கோயில் நிர்வாகம் சார்பில் வழங்கப்படும் எனக் கோயில் அலுவலர்கள் தெரிவித்தனர்.