மே 12-ம் தேதி ஓடிடியில் வெளியாகும் ‘யாத்திசை’ திரைப்படம் 

தரணி ராசேந்திரன் இயக்கத்தில் உருவான ‘யாத்திசை’ திரைப்படம் மே 12-ம் தேதி அமேசான் ப்ரைம் ஓடிடி தளத்தில் வெளியாகும் என அதிகாரபூர்வமாக அறிவிக்கப்பட்டுள்ளது.

அறிமுக இயக்குநர் தரணி ராசேந்திரன் இயக்கத்தில் சேயோன், சக்தி மித்ரன், ராஜலக்ஷ்மி, குருசோம சுந்தரம் உள்ளிட்ட பலர் நடித்த படம் ‘யாத்திசை’. கடந்த ஏப்ரல் 21-ம் தேதி திரையரங்குகளில் வெளியான இப்படம் ரசிகர்களிடையே நல்ல வரேற்பை பெற்றது. பாண்டியர் - எயினர் குல வரலாற்றை புனைவு கலந்து சொல்லியிருக்கும் இப்படத்தை வீனஸ் இன்ஃபோடெயின்மென்ட், சிக்ஸ் ஸ்டார் என்டர்டெயின்மென்ட் நிறுவனங்கள் இணைந்து தயாரித்தன.

தமிழ்நாட்டில் படத்தை சக்தி ஃபிலிம் பேக்டரி நிறுவனம் வெளியிட்டது. ரூ.7-10 கோடி பட்ஜெட்டில் உருவானதாக கூறப்படும் இப்படம் காட்சிகளில் தேவையான பிரமாண்டத்தை வரையறுக்கப்பட்ட பட்ஜெட்டுக்குள் உருவாக்கியிருந்தது ஆச்சரியத்தை ஏற்படுத்தியது. மேலும் படத்தில் வழக்கொழிந்த பழங்கால தமிழ் மொழியும் பயன்படுத்தப்பட்டுள்ளது. பல்வேறு தரப்பினரின் பாராட்டைப் பெற்ற இப்படம் வரும் மே 12-ம் தேதி அமேசான் ப்ரைம் ஓடிடி தளத்தில் வெளியாகும் என அதிகாரபூர்வமாக அறிவிக்கப்பட்டுள்ளது.