பிப்.23-ல் ஓடிடியில் வெளியாகிறது பாலகிருஷ்ணாவின் ‘வீர சிம்ஹா ரெட்டி’

பாலகிருஷ்ணா நடிப்பில் திரையரங்குகளில் ஓடிக்கொண்டிருக்கும் ‘வீர சிம்ஹா ரெட்டி’ திரைப்படம் வரும் பிப்ரவரி 23-ம் தேதி ஓடிடியில் வெளியாகும் என அறிவிக்கப்பட்டுள்ளது.

கோபிசந்த் மலினேனி இயக்கத்தில் பாலகிருஷ்ணா நடிப்பில் கடந்த ஜனவரி 12-ம் தேதி சக்ராந்தியையொட்டி வெளியான திரைப்படம் ‘வீர சிம்ஹா ரெட்டி’. ஸ்ருதிஹாசன், வரலட்சுமி சரத்குமார், ஹனி ரோஸ் உள்ளிட்ட பலர் நடித்திருந்த இப்படத்திற்கு தமன் இசையமைத்திருந்தார். மைத்ரி மூவி மேக்கர்ஸ் தயாரித்த இப்படம் சென்டிமென்ட் ஆக்‌ஷன் கதையாக உருவானது. படத்தின் மீதான விமர்சனங்கள் ஒருபுறமிருந்தாலும், வசூல் ரீதியாக படம் வரவேற்பை பெற்றது.

ரூ.110 கோடி பட்ஜெட்டில் உருவான இப்படம் உலக அளவில் ரூ.140 கோடி வரை வசூலித்துள்ளதாக தகவல் வெளியாகியுள்ளது. படத்தைப் பார்த்துவிட்டு படத்தின் இயக்குநரை நடிகர் ரஜினிகாந்த் தொலைபேசியில் அழைத்து பாராட்டியிருந்தார். இந்நிலையில், படம் வரும் பிப்ரவரி 23-ம் தேதி ஹாட் ஸ்டார் ஓடிடி தளத்தில் மாலை 6 மணிக்கு வெளியாகும் என அறிவிக்கப்பட்டுள்ளது.