சிலிக்கானில் கலைவண்ணம் கண்ட சிற்பி: கலாம் மணிமண்டபத்தில் ஓவியம், சிற்பம் படைத்த ஏ.பி.ஸ்ரீதர் நேர்காணல்

கலாமுடன் சேர்ந்து புகைப்படம் எடுத்துக் கொள்வது போன்ற ஒரு தந்திரக் கலை ஓவியத்தை, அவரது பேரன் ஷேக்குக்கு செய்துகொடுத்தேன். அது அவருக்கு மிகவும் பிடித்துப் போனது. கலாம் மணிமண்டபத்தில் உங்கள் பங்களிப்பு கட்டாயம் இருக்க வேண்டும் என்றார். மணிமண்டபம் அமைக்கும் பணிகள் தொடங்கப்பட்ட போது, இப்பணிகளை மேற்கொண்ட பாதுகாப்புத் துறைக்கு என் பெயரைப் பரிந்துரை செய்தார். கர்னல் சோபே என்பவர்தான் அதற்குத் தலைமை. அவருடன் இருந்து பணிபுரிந்து ஒட்டுமொத்தப் பணிகளையும் முடித்துக் கொடுத்தோம்.

கலாமின் 8,000 புகைப்படங்களில் இருந்து 95 புகைப்படங்களைத் தேர்வு செய்து அதை அப்படியே ஓவியமாக வரைந்தேன். மணிமண்டபத்தில் இடம்பெற்றுள்ள அனைத்து ஓவியங்களும் நான் வரைந்தவை. இது தவிர, 2 சிலிக்கான் சிலை களையும் செய்தேன்.

என்னோடு சேர்ந்து 12 பேர் கொண்ட அணி சுமார் இரண்டரை மாதங்களாகப் பணிபுரிந்தோம். டெல்லி ராஷ்டிரபதி பவனில் கலாம் எப்படி இருந்தாரோ, அப்படியே தத்ரூபமாக அந்த இடம்போலவே வடிவமைத்துள்ளோம். அவர் நின்றுகொண்டிருப்பதுபோன்ற சிலையையும் வடிவமைத்துள்ளேன்.

இந்த ஓவியங்களும், சிலைகளும் பிரமாதமாக இருப்பதாக, பிரதமர் மோடி வியந்து பாராட்டினார். 2 சிலிக்கான் சிலைகளுடன் நின்று புகைப்படமும் எடுத்துக்கொண்டார். பொதுக்கூட்டத்தில் பேசும்போது, ‘‘இப்பணிகளை இவ்வளவு அழகாக, விரைவாகச் செய்து முடித்தவர்களுக் காக, எழுந்து நின்று கைதட்டுங்கள்’’ என்றவுடன், சுமார் 40 ஆயிரம் பேரும் எழுந்து நின்று கைதட்டியது, வாழ்க்கையில் மறக்க முடியாத அனுபவம்.