புதிய வாசல்களைத் திறக்குமா முதலமைச்சரின் அயல்நாட்டுப் பயணம்?

தமிழ்நாட்டுக்கு முதலீடுகளை ஈர்க்கும் நோக்கிலும் சென்னையில் 2024 ஜனவரி 10, 11 ஆகிய தேதிகளில் நடைபெறவிருக்கும் உலக முதலீட்டாளர்கள் மாநாட்டுக்குத் தொழில் நிறுவனங்களுக்கு அழைப்பு விடுக்கவும் சிங்கப்பூர், ஜப்பான் ஆகிய நாடுகளுக்கு முதலமைச்சர் மு.க.ஸ்டாலின் மேற்கொண்ட ஒன்பது நாள் அரசுமுறைப் பயணம், மிகுந்த எதிர்பார்ப்பை ஏற்படுத்தியிருக்கிறது.

முதலீடுகளை ஈர்க்கும் நோக்கிலான முதலமைச்சரின் முதல் வெளிநாட்டுப் பயணமாக மார்ச் 2022இல் துபாய் பயணம் அமைந்தது. அப்போது 6 நிறுவனங்களுடன் மேற்கொள்ளப்பட்ட புரிந்துணர்வு ஒப்பந்தங்களின்படி ரூ.6,100 கோடி முதலீடுகள் மூலம் 15,100 வேலைவாய்ப்புகள் கிடைக்கும் என்று அரசுத் தரப்பில் தெரிவிக்கப்பட்டது. இந்நிலையில், திமுக ஆட்சிப் பொறுப்பேற்ற 2021ஆம் ஆண்டின் மத்தியிலிருந்து தற்போது வரை 226 புரிந்துணர்வு ஒப்பந்தங்களின் மூலம் ரூ.2,95,339 கோடி முதலீடுகள் உறுதியாகியுள்ளதாகவும் அவை முழுமையாகச் செயல்பாட்டுக்கு வரும்போது 4.12 லட்சம் பேருக்கு வேலைவாய்ப்பு கிடைக்கும் என்றும் முதலமைச்சர் தெரிவித்துள்ளார்.