ஆராய்ச்சிப் படிப்புகள்: அதிகரிக்கட்டும் மகளிர் பங்களிப்பு

தமிழ்நாட்டில் உயர் கல்வி பயில்வோரின் சதவீதம் (51.4), தேசியச் சராசரியைவிட (27.1) கிட்டத்தட்ட இரண்டு மடங்கு அதிகம் என்கிறது தேசிய உயர் கல்விக் கணக்கெடுப்பு (2019-20). குறிப்பாக நம் மாநிலத்தில், ஆண்களைப் பெண்கள் ஒரு சதவீதத்தில் முந்தியிருக்கிறார்கள் என்பது இன்னொரு பெருமிதம்.

அதே நேரம், இந்தப் பெண்கள் முதுகலையில் கலை, அறிவியல், வணிகவியல் போன்ற பிரிவுகளை மட்டுமே தேர்ந்தெடுக்கிறார்கள் என்பதுதான் நெருடலைத் தருகிறது. ஸ்டெம் (STEM) எனக் குறிப்பிடப்படும் அறிவியல், தொழில்நுட்பம், பொறியியல், கணிதம் ஆகிய பிரிவுகளில் சேரும் பெண்களின் எண்ணிக்கை மிகக் குறைவு.