ஒரே நாடு... ஒரே தேர்தல்: அவசரம் கூடாது!

‘ஒரே நாடு... ஒரே தேர்தல்’ திட்டம் குறித்த விவாதம் மீண்டும் தொடங்கியிருக்கிறது. மக்களவைக்கும், மாநிலங்கள், யூனியன் பிரதேசங்களின் சட்டமன்றங்களுக்கும் ஒரே நேரத்தில் தேர்தல் நடத்த வகைசெய்யும் இத்திட்டம் குறித்து அரசியல் கட்சிகளின் கருத்தை தேசியச் சட்ட ஆணையம் கேட்டறிந்துவருகிறது. இவ்விஷயத்தில் விடை காண வேண்டிய கேள்விகள் ஏராளமாக இருக்கின்றன.

1967 வரை மக்களவைக்கும் மாநில சட்டமன்றங்களுக்கும் ஒன்றாகத்தான் தேர்தல்கள் நடத்தப்பட்டுவந்தன. அதற்குப் பிறகு சில மாநில அரசுகள் கலைக்கப்பட்டது, புதிய மாநிலங்கள் உருவானது உள்ளிட்ட காரணங்களால் மக்களவைக்கும் பல மாநிலங்களின் சட்டமன்றங்களுக்கும் வெவ்வேறு நேரத்தில் தேர்தல் நடத்த வேண்டிய சூழல் உருவானது.