பெண்கள் பிரதிநிதித்துவம் நீதித் துறையில் முழுமைபெறட்டும்!

இந்திய அரசமைப்பு நாளன்று, உச்ச நீதிமன்றத்தில் நடைபெற்ற நிகழ்ச்சியில் பேசிய தலைமை நீதிபதி டி.ஒய்.சந்திரசூட், “சட்டம் மற்றும் நீதித் துறையில் பெண்கள், விளிம்புநிலை மக்களுக்கான பிரதிநிதித்துவத்தை அதிகரிக்க வேண்டியது அவசியம்” என வலியுறுத்தியிருக்கிறார். 70 ஆண்டுகளைக் கடந்த உச்ச நீதிமன்ற வரலாற்றில், பெண் ஒருவர் தலைமை நீதிபதியாக இதுவரை நியமிக்கப்படவில்லை என்பது வருத்தத்துக்குரியது.

மத்திய சட்ட அமைச்சகம் 2020 இல் நாடாளுமன்றத்துக்கு அளித்த தரவுகளின்படி, இந்தியாவில் உள்ள 25 உயர் நீதிமன்றங்களில் பொறுப்பில் உள்ள நீதிபதிகளில், பெண்கள் 80 பேர்; ஆண்கள் 1,100க்கும் மேல். ‘விதி’ என்னும் தனியார் நிறுவனம் நடத்திய ஆய்வில், சார்பு நீதிமன்றங்களில் பெண் நீதிபதிகள் 30% என்றும், பெண்கள் குறித்துப் போதுமான தரவுகள் பதிவு செய்யப்பட்டிருக்கவில்லை என்றும் தெரியவந்தது.