போக்சோ விசாரணையில் வரவேற்கத்தக்க மாற்றம்

பதினெட்டு வயதுக்கு உட்பட்ட சிறார் மீதான பாலியல் வன்முறையைத் தடுப்பதற்கான ‘போக்சோ’ சட்டத்தின் கீழ் பதியப்படும் பாலியல் குற்ற வழக்குகளைக் கண்காணிப்பதற்கான சிறப்புக் குழுக்களைத் தென்மண்டல ஐஜி அஸ்ரா கார்க் உருவாக்கியுள்ளது வரவேற்கத்தக்கது. வழக்கு பதியப்படுவது, நீதிமன்ற விசாரணை, வழக்கு குறித்த தகவல்களைப் பாதிக்கப்பட்ட சிறார் - அவர்களின் பெற்றோருக்குத் தெரிவித்தல், குற்றவாளிகளுக்குத் தண்டனை பெற்றுத் தருதல் ஆகிய அனைத்தையும் இந்தக் குழு தொடர்ந்து கண்காணிக்கும்.

தென்மண்டல ஐஜியாகப் பொறுப்பேற்ற பிறகு, குற்றவாளிகளைக் கைது செய்து வழக்குகளைப் பதிவு செய்வதைத் தாண்டி, குற்றங்களை நீதிமன்றத்தில் நிரூபித்து உரிய நேரத்தில் தண்டனை பெற்றுத் தருவதையும் பாதிக்கப்பட்ட சிறாருக்கு மறுவாழ்வை உறுதி செய்வதையும் உள்ளடக்கிய முழுமையான பார்வையுடன் போக்சோ வழக்குகளைக் கையாளும் அணுகுமுறை மாற்றத்துக்கு வித்திட்டிருக்கிறார் அஸ்ரா கார்க். இதற்காகவே அதிகாரிகள் சிலர் குழுவாக இணைந்து போக்சோ சட்டத்தையும் அதன் விதிகளையும் விரிவாகப் படித்துத் தெளிவடைந்திருக்கின்றனர்.