பிணை தனிச் சட்டம்: சீர்திருத்தத்தின் முதல்படி!

இந்திய சிறைச்சாலைகள் விசாரணைக் கைதிகளால் நிறைந்திருக்கும் நிலைக்கு முற்றுப்புள்ளி வைத்திட, பிணை வழங்குதலுக்குத் தனிச் சட்டத்தை இயற்றுமாறு உச்ச நீதிமன்றம் மத்திய அரசைக் கேட்டுக்கொண்டிருப்பது வரவேற்புக்குரியது. தற்போது இந்தியா முழுவதும் உள்ள சிறைவாசிகளில் ஏறக்குறைய மூன்றில் இரண்டு பங்கு பேர் விசாரணைக் கைதிகள் என்று புள்ளிவிவரங்கள் தெரிவிக்கின்றன.

இந்நிலையில், பிரிட்டனில் உள்ள பிணைச் சட்டங்களை மேற்கோள் காட்டியுள்ள நீதிபதிகள் எஸ்.கே.கவுல், எம்.எம்.சுந்தரேஷ் அடங்கிய அமர்வு, இந்தியாவிலும் அப்படியொரு தனிச் சட்டத்துக்கான தேவையை வலியுறுத்தியுள்ளது. மேலும், பிணை கோரும் மனுக்களுக்கு இரண்டு வாரங்களுக்குள்ளும், முன்ஜாமீன் மனுக்களுக்கு ஆறு வாரங்களுக்குள்ளும் முடிவெடுக்குமாறு அறிவுறுத்தியுள்ளது.