குகேஷ்: இந்தியாவின் பெருமிதம் 

உலக செஸ் சாம்பியன்ஷிப் போட்டியில் விளையாடுவதற்குத் தகுதிபெறுவதற்கான ‘கேண்டிடேட்ஸ்’ போட்டித் தொடரில் சென்னையைச் சேர்ந்த குகேஷ் வெற்றிபெற்று, ஒட்டுமொத்த தேசத்துக்கும் பெருமை சேர்த்துள்ளார். செஸ் விளையாட்டில் இந்தியாவின் தலைசிறந்த சாதனைகளில் இதுவும் ஒன்று என்பதில் சந்தேகமில்லை.

பொதுவாக செஸ் விளையாட்டில் உலக சாம்பியன் பட்டத்துக்கான போட்டிக்கு நடப்பு சாம்பியன் நேரடியாகத் தகுதி பெற்றுவிடுவார். அவருடன் போட்டிபோட வேண்டியவர் யார் என்பது கேண்டிடேட்ஸ் போட்டித் தொடரின் மூலம் தீர்மானிக்கப்படும்.