சாதிச் சான்றிதழ் சிக்கல்: இனியும் அலட்சியம் கூடாது!

சாதிச் சான்றிதழ் பெற முடியாததால் கல்லூரியில் சேர முடியாத வருத்தத்தில், 12ஆம் வகுப்பு முடித்த மாணவி தற்கொலை செய்துகொண்ட சம்பவம் அதிர்ச்சியையும் வேதனையையும் தருகிறது. இதுபோன்ற துயர நிகழ்வுகள் தமிழகத்தில் சாதிச் சான்றிதழ் பெறும் நடைமுறையில் நிலவும் சிக்கல்களையும் அரசு இயந்திரத்தின் செயல்படாத தன்மையையும் காட்டுகின்றன.

திருவண்ணாமலை மாவட்டம் எடப்பாளையம் கிராமத்தைச் சேர்ந்த 17 வயது மாணவி, தான் பட்டியல் சாதியைச் சேர்ந்தவர் என்பதற்கான சான்றிதழுக்காக இணையம் மூலம் விண்ணப்பித்திருந்தார். ஆனால், உரிய நேரத்தில் சான்றிதழ் கிடைக்காததால் மனமுடைந்து விபரீத முடிவை எடுத்துவிட்டார். சாதிச் சான்றிதழ் கிடைக்கப்பெறாததால் 2022 ஜூலை மாதத்தில் திருவள்ளூர் மாவட்டம் பள்ளிப்பட்டு கிராமத்தைச் சேர்ந்தபெரியசாமி என்பவரும் அக்டோபர் மாதத்தில் காஞ்சிபுரம் மாவட்டம் படப்பையைச் சேர்ந்த வேல்முருகன் என்பவரும் உயிரை மாய்த்துக்கொண்டனர்.