அச்சுறுத்தும் கார்ட்டூன் அலைவரிசைகள்!

குழந்தைகள் விரும்பிப் பார்க்கும் கார்ட்டூன் அலைவரிசைகளில், குழந்தைப் பருவத்துக்குப் பொருத்தம் இல்லாத அதீதக் கற்பனைக் காட்சிகளும், வன்முறைக் காட்சிகளும் இடம்பெறுவது சமீபகாலமாக அதிகரித்திருக்கிறது. குழந்தைகளுக்கு உளவியல் சிக்கலை ஏற்படுத்தும் வகையிலான இந்தப் போக்கு குறித்த உரையாடல் அவசியம்.

இன்றைக்குக் குழந்தைகளுக்குக் கதை சொல்ல தாத்தா - பாட்டிகள் இல்லை. அந்தப் பெரும் வெற்றிடத்தை நிரப்புகின்ற பணியை கார்ட்டூன் அலைவரிசைகள் செய்கின்றன. ஒவ்வொரு அலைவரிசையும் தனக்கான நிரந்தரக் கதாபாத்திரங்களை உருவாக்கி, கதைக் களத்தை மட்டும் மாற்றி அமைத்துக்கொள்கின்றன. இந்தக் கதைகளில் வருகின்ற சில கதாபாத்திரங்கள், எதிர்பாராத தருணங்களில் வன்முறையை விதைக்கும் வகையில் பேசுவதைக் காண முடிகிறது.