சிந்தனை வெளியைக் காட்டும் சாளரங்கள் - 1 | செக்ஸ்டஸ் எம்பிரிகஸ்: ஐயமே மருந்து

கிரேக்கத் தத்துவத்தில் ‘ஸ்கெப்டிசிஸம்’ என்று அழைக்கப்பட்டதைத் தமிழில் ‘ஐயவாதம்’ என்று கூறலாம். பண்டைய கிரேக்க ஐயவாதத்தில் பல பிரிவுகள் உண்டு. அவற்றில் முக்கியமான ஒரு தத்துவவாதி, செக்ஸ்டஸ் எம்பிரிகஸ் [Sextus Empiricus]. இவர் ஒரு மருத்துவர். பொ.ஆ. (கி.பி.)இரண்டாம் நூற்றாண்டின் பிற்பகுதியிலும், மூன்றாம் நூற்றாண்டின் முற்பகுதியிலும் வாழ்ந்தவர். இவர் ஐயவாத பிதாமகர் பைரோவின் சிந்தனைகளைப் பின்பற்றியவர். அந்தப் பிரிவின் ஐயவாதச் சிந்தனைகளைத் தொகுத்தளித்தவர்.

செக்ஸ்டஸ் எம்பிரிகஸின் எழுத்துகளிலிருந்து தெரிவுசெய்யப்பட்ட பகுதிகளைத் தொகுத்து ‘ஐயவாதம், மனிதன், கடவுள் குறித்த எழுத்துகளின் தெரிவுசெய்யப்பட்ட பகுதிகள்’ [Sextus Empiricus: Selections from the Major Writings on Scepticism, Man, and God] என்ற தலைப்பில் நூலாக்கியவர் பிலிப்.பி.ஹாலி (1922-1994) என்கிற அமெரிக்கப் பேராசிரியர்.