தமிழ்நாடு பட்ஜெட் 2023 எதிர்பார்ப்புகள் | ஊட்டச்சத்துச் சமமின்மை: களைவது எப்போது?

தமிழ்நாடு அரசு தாக்கல் செய்யவிருக்கும் நிதிநிலை அறிக்கையில், உடற்பருமனை அடிப்படையாகக் கொண்ட ஊட்டச்சத்துச் சமநிலையின்மை குறித்த அறிவிப்புகள் இடம்பெறுமா என்பது எதிர்பார்க்க வேண்டிய ஓர் அம்சமாக உள்ளது. குழந்தைகள், அரசுப் பள்ளிச் சிறார்களுக்கான சிறப்புத் திட்டம் உள்படப் பல்வேறு திட்டங்களைச் செயல்படுத்திவரும் முன்னோடி மாநிலமாகத் தமிழ்நாடு திகழ்கிறது. அதே நேரம், ‘ஊட்டச்சத்துக் குறைபாடு இல்லாத தமிழ்நாடு’ (Malnutrition free Tamil Nadu) என்கிற இலக்கை அடைய இன்னும் தொலைநோக்குத் திட்டங்களும் போதிய நிதியாதாரங்களும் அவசியம்.

உண்மை நிலை: அனைத்து வகையான ஊட்டச்சத்து தொடர்பான குறியீடுகளிலும் தமிழ்நாடு சிறந்து விளங்குகிறது; ஒப்பீட்டளவில் ஏனைய மாநிலங்களைவிடச் சிறப்பான இடத்திலும் இருக்கிறது. ஆனால், ஊட்டச்சத்துக் குறியீடுகளின் அளவைப் பொறுத்தவரை, உலக சுகாதார நிறுவனம் பரிந்துரைக்கும் நிலையைத் தமிழ்நாட்டின் பல மாவட்டங்கள் இன்னும் எட்டவில்லை என்பதும் உறுத்தும் உண்மையாக இருக்கிறது.