பாலியல் சமத்துவம்: இன்னும் நூறாண்டுகள்?

நான் வசிக்கும் வீதியில் உள்ள ஓர் அரசு அலுவலகத்தில் பணிபுரியும் ஒரு பெண்ணை, சமீபத்தில் ஒரு பேரங்காடியில் பார்த்தேன். வாங்கிய பொருள்களுக்குப் பணம் செலுத்துவதற்காகக் கையில் ரூபாய் நோட்டுகளுடன் தடுமாறிக்கொண்டிருந்தார். அவரை அணுகி, ‘ஏன் இந்தச் சிரமம்? கைப்பேசி வழியாகவே பணம் அனுப்ப வேண்டியதுதானே?’ என்றேன்.

‘என் கைப்பேசியில் அந்த வசதி இல்லை; என் ஏடிஎம் அட்டைகூட எப்போதும் என் கணவரிடம்தான் இருக்கும்’ என அவர் சொன்னது அதிர்ச்சியளித்தது. மனைவியின் ஏடிஎம் அட்டையைக் கணவனே வைத்துக்கொள்வது கூடப் பாலினச் சமத்துவமின்மையின் வெளிப்பாடுதான்; இதுவும் ஒருவகையான வன்முறைதான்.