2022 கற்றதும் பெற்றதும்: சமகாலத்தைப் புரிந்துகொள்ள முடியுமா?

இன்றைக்குச் சரியாக நூறு ஆண்டுகளுக்குமுன், 1922 டிசம்பர் 30 அன்று, சோவியத் ஒன்றியக் குடியரசு நிறுவப்பட்டபோது, ஒரு சமகாலம் தொடங்கியது. முதலாம் உலகப் போர், அதைத் தொடர்ந்து ‘ஸ்பானிஷ் ஃப்ளூ’ பரவல் எனப் பெரும் கொந்தளிப்புக்குப் பிறகு, ‘கர்ஜிக்கும் இருபது’களில் (Roaring Twenties) மேற்குலகம் நுழைய, அதன் ஒரு பகுதியோ ‘கம்யூனிசப் பெருங்கன’வை நோக்கிய முதல் அடியை எடுத்துவைத்தது. பனிப்போர் உள்ளிட்ட புறநெருக்கடிகளை இரண்டாம் உலகப் போருக்குப் பின் எதிர்கொண்டு முன்னகர்ந்த அந்தச் சமகாலம், சோவியத்தின் உள்ளார்ந்த நெருக்கடிகளின் தீவிரமும் இணைய, வெகு சீக்கிரமாகவே முடிவுக்குவந்தது. நிறுவப்பட்ட 69 ஆண்டுகளிலேயே (1991) சோவியத் ஒன்றியம் வீழ்ந்தது.