சொல்… பொருள்… தெளிவு: மக்கள் தொகை 800 கோடி

நவம்பர் 15, 2022 அன்று உலக மக்கள்தொகை 800 கோடியைத் (8 பில்லியன்) தொட்டிருப்பதாக, ஐ.நா.வின் பொருளாதார - சமூக விவகாரங்கள் துறை (UN DESA) தெரிவித்துள்ளது. 70 ஆண்டுகளுக்கு முன்புவரைகூட, உலக மக்கள்தொகை 250 கோடியாக இருந்தது. அறிவியல் தொழில்நுட்பத்தின் அசாத்தியப் பாய்ச்சல், உணவு-சுகாதாரத் துறைகளை மேம்படுத்தியது. சுகாதாரம், வறுமை ஒழிப்பு, கல்வி ஆகிய தளங்களில் நேர்மறையான முன்னெடுப்புகளும் குழந்தை இறப்பு விகிதம், மகப்பேறு மரணம் ஆகிய குறியீடுகளின் வீழ்ச்சியும் மனிதகுலத்தின் சராசரி ஆயுட்கால நீட்டிப்புக்குப் பங்களித்த முக்கியக் காரணிகளாகும்.

குறையும் வளர்ச்சி விகிதம்: இந்தப் பின்னணியில் 1987, 1999, 2011 ஆகிய ஆண்டுகளில் உலக மக்கள்தொகை முறையே 500, 600, 700 கோடியை எட்டியது. ஆனால், உலக மக்கள்தொகை வளர்ச்சி விகிதம் 1950 முதல் குறைந்துவருகிறது; 2020இல் அது ஆண்டுக்கு 1% என்ற அளவுக்குக் குறைந்தது. உலக மக்கள்தொகை, 700இலிருந்து 800 கோடியாக உயர்வதற்கு 12 ஆண்டுகள் எடுத்துக்கொண்ட நிலையில், 900 கோடியாக உயர்வதற்குச் சுமார் 15 ஆண்டுகள் (2037) ஆகலாம் எனக் கணிக்கப்பட்டுள்ளது. உலகளாவிய மக்கள்தொகை வளர்ச்சி விகிதம் குறைந்துவருவது இதன்மூலம் வெளிப்படையாகிறது.