தென் அமெரிக்கக் கால்பந்தாட்டம்: விளையாட்டு எனும் படைப்புக்கலை!

ஐரோப்பாவில்தான் கால்பந்தாட்டம் பிறந்தது. 19ஆம் நூற்றாண்டின் இறுதியில் அது தென் அமெரிக்காவில் அறிமுகமானது; இங்கிலாந்தில் கல்வி பயின்ற சார்லஸ் மில்லர் என்ற பிரேசிலியரால் தென் அமெரிக்காவுக்குக் கால்பந்தாட்டம் அறிமுகப்படுத்தப்பட்டதாகச் சொல்லப்படுகிறது. இருந்தாலும், தென் அமெரிக்காவில்தான் அதன் உண்மையான கலைஞர்கள் வாழ்கிறார்கள். ஐரோப்பிய நாடுகளின் காலனிகளாக இருந்து சுதந்திரம் பெற்ற இந்த நாடுகளில்தான், இந்த விளையாட்டு ஒரு கலையாக உருவானது.

உயிர்பெற்ற விளையாட்டு: கால்பந்து அவர்களுக்குக் கைமாறிக் கிடைத்த கலையாக இருந்தாலும் பிரேசில், அர்ஜெண்டினா, உருகுவே, கொலம்பியா, பெரு போன்ற நாடுகளின் முதல் தலைமுறைக் கலைஞர்கள் அதை உயிர்ப்புடன் அடுத்த தலைமுறைக்குக் கடத்தினர். இந்தியாவில் கிரிக்கெட்டைப் போல் அல்லாமல் கால்பந்தாட்டம் தென் அமெரிக்காவில் பரவலாக்கமடைந்தது. இன்றும் உலகம் வியந்து பார்க்கப்போகும் கால்பந்தாட்ட நாயகன் தென் அமெரிக்காவின் ஏதோ ஒரு தெருவில்தான் சுற்றிக்கொண்டிருக்கிறான்.