பூவுலகைக் காப்பாற்றுமா ‘காப் 27’?

எகிப்து நாட்டின் சினாய் தீபகற்பத்தில் செங்கடலின் கரையில் அமைந்திருக்கிறது ஷார்ம் எல்-ஷேக். விடுமுறைக் கால நகரமான இங்கு உலக நாடுகளின் தலைவர்கள், அரசாங்கப் பிரதிநிதிகள், பெருந்தொழிலதிபர்கள் என உலக இயக்கத்தைத் தீர்மானிக்கும் பிரிவினர் அடுத்த இரண்டு வாரங்களுக்கு முகாமிடுகிறார்கள். அன்றாட அரசியல் நெருக்கடிகளிலிருந்து விடுபட்டு விடுமுறையைக் கழிப்பதற்காக அங்கு முகாமிட்டிருக்கவில்லை. மாறாக, காலநிலை மாற்றத்தின் பின்னணியில் புவியின்எதிர்காலத்தையும் மனிதகுலத்தை உள்ளடக்கிய உயிரினங்களின் இருப்பையும் தீர்மானிக்கவிருக்கும் ‘தீர்க்கமான அரசியல் முடிவு’களை எட்டுவதற்காகக் கூடியிருக்கிறார்கள்.