உங்கள் வீட்டில் ‘குழந்தை மேதை’ இல்லையா?

சென்னை செஸ் ஒலிம்பியாட் தொடக்க விழாவில் சிறு வயதிலேயே பிரபலமடைந்த இரண்டு பேர் மீது பலருடைய கவனமும் குவிந்திருந்தது. ஒருவர் பியானோ கலைஞர் லிடியன் நாதஸ்வரம், மற்றொருவர் செஸ் வீரர் பிரக்ஞானந்தா.

2018இல் கிராண்ட்மாஸ்டர் பட்டத்தைத் தனது 12ஆவது வயதில் பெற்றபோது, உலகின் கவனத்தை பிரக்ஞானந்தா முதலில் ஈர்த்தார். சமீபத்தில் இணையவழிப் போட்டிகளில் உலக செஸ் சாம்பியன் மேக்னஸ் கார்ல்சனை இரண்டு முறை வீழ்த்தியபோது மீண்டும் கவனம் பெற்றார். அமெரிக்காவின் சி.பி.எஸ். தொலைக்காட்சி அலைவரிசை நடத்திய ‘தி வேர்ல்ட்ஸ் பெஸ்ட்’ போட்டியில் பியானோ வாசித்து 2019இல் முதலிடம் பெற்று உலகின் கவனத்தை ஈர்த்தார் லிடியன்.