நிலத்தடி நீர்ப் பயன்பாட்டுக்கான கட்டணம் நியாயமானதா?

நிலத்தடி நீரைப் பயன்படுத்தும் அனைவருக்கும் கட்டணம் செலுத்த வேண்டும் என மத்திய நிலத்தடி நீர் ஆணையம் சமீபத்தில் வெளியிட்ட அறிவிப்பு, பயனாளிகளிடையே அச்சத்தை உருவாக்கியது. நிலத்தடி நீரைப் பயன்படுத்துவதற்கான கட்டணம் நியாயமானதா? இந்த நிலைக்கு நாம் ஏன் தள்ளப்பட்டுள்ளோம்?

1980–களிலிருந்து பல்வேறு தேவைகளுக்காக நிலத்தடி நீர்ப் பயன்பாடு இந்தியாவில் பெருமளவில் அதிகரித்துள்ளது. உலகில் மிக அதிகமாக நிலத்தடி நீரைச் சுரண்டும் நாடான இந்தியாவில், 2020-ம் ஆண்டின் புள்ளிவிவரப்படி வருடாந்திர நிலத்தடி நீர் சுரண்டலானது 245 பிசிஎம் என மதிப்பிடப்பட்டுள்ளது.