அஞ்சலி | ஊரன் அடிகள் அருள்நிறைப் பெருவாழ்வு!

திருச்சி சமயபுரத்துக்கு அருகில் நரசிங்கமங்கலத்தில் பிறந்தவர் ஊரன் அடிகளார் (22.05.1933 –13.07.2022). நாகரத்தினம் அம்மைக்கும் இராமசாமிக்கும் 22.05.1933இல் பிறந்த இவருடைய இயற்பெயர் குப்புசாமி. தந்தைவழியில் செல்வமும் தாய்வழியில் கல்வியும் இவருக்குக் கிட்டியது. அன்னையார் நாகரத்தினம் அம்மை சீரிய வாசிப்பாளர். அம்மையார் இளமையில் படித்த புத்தகங்களைக்கூட இறுதிவரை தன் நூலகத்தில் பாதுகாத்து வைத்திருந்தார் அடிகளார். தாய் தந்தையிடம் வளர்ந்ததைவிடவும் தாய்வழித் தாத்தா -பாட்டியிடமே அதிக காலம் வளர்ந்த இவருக்கு, தாத்தா சுப்பையாவே வித்யாகுருவாக விளங்கினார். அதோடு வள்ளலாரிடம் வந்துசேர்வதற்குக் காரணமும் இவரே.