இரு நாவல்கள்

வண்ணநிலவனின் ‘கடல்புரத்தில்’, சம்பத் எழுதிய ‘இடைவெளி’ - இந்த இரு நாவல்களும் வெவ்வேறு வகை. ஒன்று, மீனவ சமூகத்தின் வாழ்க்கை ஓட்டத்தை யதார்த்தமாகச் சொல்வது. இன்னொன்று, மனைவியால் பைத்தியம் என்றும் சித்தரிக்கப்பட்ட ஒரு இயந்திரகதியான வாழ்க்கைச் சக்கரத்தில் மாட்டிக்கொண்டு தவிக்கும் ஒரு தனிமனிதனின் உள்மனப் போராட்டம்.

‘இடைவெளி’ நாவலைப் பார்ப்போம். சதா சர்வகாலமும் சாவு என்றால் என்ன என்ற கேள்வியிலேயே உழலும் தினகரனின் கதைதான் இது. எங்கிருந்தாலும், யாருடன் பேசும்போதும் இந்தக் கேள்வியே சுற்றிச் சுற்றி வந்து தினகரனைத் தாக்கும். தற்கொலை செய்துகொள்ளலாம் என்று முடிவெடுத்தும் அது முடியாமல் போகிறது.