சாதியக் கட்டமைப்பின் தாக்கம் பெண்கள் மீது அதிகம்!

லண்டனில் இருந்தபோது, சங்கர் - கவுசல்யா மீது நடத்தப்பட்ட தாக்குதல் காணொலியைச் சர்வதேச செய்தித் தொலைக்காட்சிகளில் பார்த்தேன். இந்தியச் சமூகத்தில் வேரூன்றியிருக்கும் சாதிய அடக்குமுறைகளையும் அதற்கு எதிரான இளம் தலைமுறையினரின் எண்ணங் களையும் பதிவுசெய்ய வேண்டும் என்று விரும்பினேன். முதலில் கேம்பிரிட்ஜ் பல்கலைக்கழகத்துக்கான ஆவணப் பட புராஜெக்டாகத்தான் இதைத் திட்டமிட்டேன். ஆனால், இது சிறு குழுவுக்கான ஆய்வுத் தயாரிப்பாக முடிந்து விடாமல் உலக மக்களைச் சென்றடைய வேண்டும் என்று தோன்றியது. எனவே, ஆஸ்கர் விருது வென்ற ஆவணப் பட இயக்குநர் ஆர்லாண்டோ வான் எயின்சீடலின் தலைமையில் இப்படத்தை உருவாக்கினேன். அல்ஜஸீரா இதை யூடியூபில் வெளியிட்டிருக்கிறது.

நான் பிறந்தது கோயம்புத்தூரில். படித்து வளர்ந்தது மைசூரில். லண்டனில் ஏழாண்டுகள் வங்கி நிர்வாகியாகப் பணிபுரிந்த பிறகு, கேம்பிரிட்ஜ் பல்கலைக்கழகத்தில் புலனாய்வு இதழியல் மற்றும் எம்.ஏ. ஆவணப்படத் தயாரிப்பு படித்தேன். அதிலிருந்து மனித உரிமை மற்றும் முரண்பாடுகள்குறித்த ஆய்வில் ஈடுபடத் தொடங்கினேன். பி.பி.சி., அல்ஜஸீரா, சேனல் 4 உள்ளிட்ட சர்வதேச ஒளி பரப்பு நிறுவனங்களுக்காகப் பல புலனாய்வு சார்ந்த ஆய்வுப் பணிகளில் ஈடுபடத் தொடங்கினேன்.

பாதிக்கப்பட்டவரின் குரலை மட்டுமே படம்பிடிப்பது தான் சரி என்று செயல்பாட்டாளர்கள் கருதலாம். ‘எதிர்த் தரப்பைப் பதிவுசெய்தால் கவுசல்யாவின் நியாயம் அடி பட்டுப்போகாதா?’ என்று பலரும் என்னிடம் வாதிட்டனர்.

சாதியத்தைப் பொறுத்தவரை பொறுப்பேற்க வேண்டிய நிலையில் ஒட்டுமொத்தச் சமூகமும் இருப்பதால், ஒரு தரப்பை மட்டும் காட்டுவதில் நியாயம் இல்லை என நம்பினேன்.

இங்கு பாதிக்கப்பட்ட சங்கரின் குரலாக கவுசல்யா ஒலிக்கிறார். அவருடைய தாய் அன்னலட்சுமி, தம்பி கவுதம், உறவினர்கள், அவர்களுக்காக வாதாடிய வழக்கறிஞர் ஏ.பி.ஜெயசந்திரன் ஆகியோரிடமும் நான் என்ன செய்யவிருக்கிறேன் என்பதை விரிவாக விளக்கினேன்.

கவுசல்யாவின் தாய் எடுத்த எடுப்பில், ‘அவளிடம் கேட்க என்னவிருக்கிறது?’ என்றுதான் கேட்டார். ‘நீங்கள் சொல்ல நினைப்பதையும் சொல்லுங்கள். என்னுடைய படத்தில் விவரணைக் குரல் கிடையாது. அதனால், நீங்கள் சொல்வதற்கு வேறு அர்த்தம் கற்பிக்க மாட்டேன்’ என்றேன். அனைவரிடமும் சம்மதம் பெற எட்டு மாதக் காலம் பிடித்தது.

உண்மைதான். குறிப்பாக கவுதமுடன் உரையாடும் போது பல நேரங்களில் இறுக்கமாகவும் சில நேரம் கடுமையான கொந்தளிப்போடும் பேசுவார். சாதியப் பெருமை பேசி அவர் கவுசல்யாவின் திருமணத்தை மறுப்பதைப் படத்தில் இடம்பெறச்செய்வது என்பது அவர் களுடைய குற்றத்தை வெட்டவெளிச்சத்துக்குக் கொண்டுவரலாம். ஆனால், அதன் வழியாக மீண்டும் சாதிய வன்மத்தைத்தான் என்னுடைய படைப்பும் விதைத்துவிடும் என்பதால் அதுபோன்ற காட்சிகளைத் தவிர்த்துவிட்டேன்.

மொத்தம் 20 மணி நேரம் எடுக்கப்பட்ட படத்தில் தற்போது 25 நிமிடங்களைத்தான் வெளியிட்டிருக்கிறேன். செப்டம்பர் மாதம் மேலும் 45 நிமிடங்களுக்கான பதிவை யும் வெளியிடுவேன். அதில் குற்றம்சாட்டப்பட்ட 11 பேரின் கருத்துகளும் அரசுத் தரப்பு வழக்கறிஞரின் வாதமும் முன்வைக்கப்படும். அதில் சங்கர் குடும்பத்தாரின் குரலும் இடம்பெறும்.

சாதியக் கட்டமைப்பின் தாக்கம் பெண்கள் மீது அதிக மாக இருக்கிறது. ஒரு வகையில் கவுசல்யாவின் குடும்பமும் சாதியத்துக்குப் பலியானவர்கள்தான். தங்களுடைய மகள் தலித் சாதியைச் சேர்ந்தவரை மணந்துகொண்டபோது, அவர்கள் சார்ந்த சமூகமே அவர்களைத் தூற்றுவதையும், எதிர்வினையாற்ற நிர்ப்பந்திப்பதையும் நாம் யோசித்துப் பார்க்க வேண்டும். தங்களுக்கு ஏற்பட்ட சங்கடத்தை நேர்செய்வதற்காக ஈடுகட்ட ஆணவக்கொலை என்ற கொடூரத்தை நியாயப்படுத்தவே முடியாது. இருப்பினும் அப்படிப்பட்ட நிலைக்குத் தள்ளப்படும் குடும்பங்கள் தங்களுடைய சொந்தபந்தங்களுக்கு முன்பாக வெட்கித் தலைகுனிந்து நிற்கவைக்கப்படும் சூழ்நிலையையும் விவாதத்துக்குள்ளாக்க வேண்டுமென்று கருதுகிறேன்.

கிட்டத்தட்ட ஒன்றரை ஆண்டுகாலம் கவுசல்யாவுடன் தொடர்ந்து பயணித்திருக்கிறேன். சாதி மறுப்புக் கூட்டங்களில் உரைநிகழ்த்தும்போது அவரிடம் இருந்து போர்க்குணம் வெளிப்படுவதைக் கண்டு வியந்திருக்கிறேன். பல இரவுகளில் நானும் கவுசல்யாவும் பேருந்துகளில் பயணித்திருக்கிறோம். அப்போதெல்லாம் மனமுடைந்து வாடும் அவரை அருகில் இருந்து பார்த்திருக்கிறேன். ஆனால், அதில் அமிழ்ந்துவிடாமல் அவரை உந்தித்தள்ளியது தன்மீது அளவுகடந்த அன்பைப் பொழிந்த சங்கருக்காகப் போராட வேண்டும் என்கிற எண்ணம்தான். பெரியாரிய இயக்கங்களும் ஊடகங்களும் அவரது மன உறுதியை அதிகரித்திருக்கின்றன. வலி, வேதனை, எப்போதும் நொறுங்கும் மனநிலையோடு அனுதினமும் போராடும் உண்மையான போராளி அவர்!

- ம.சுசித்ரா,

தொடர்புக்கு: susithra.m@thehindutamil.co.in