மருத்துவர் - நோயாளி உறவு மனக்கசப்புகளைத் தவிர்ப்பது எப்படி?

சமீபத்தில் இதய அறுவைசிகிச்சைக்குத் தேதி குறிக்கப்பட்ட ஓர் இளைஞரை மனநலப் பரிசோதனைக்கு அழைத்து வந்திருந்தனர். ஏற்கெனவே சில வருடங்களுக்கு முன்பு அறுவைசிகிச்சை செய்யப்பட்ட இதய வால்வை மாற்றுவதற்காக, தற்போது அவர் உள்நோயாளியாக அனுமதிக்கப்பட்டிருந்தார்.

அறுவைசிகிச்சையின் முக்கியத்துவம், அதனால் ஏற்படும் நன்மைகள் பற்றி சம்பந்தப்பட்ட துறை மருத்துவர் அந்த இளைஞரிடம் விளக்கியிருந்தார். கூடவே, பின்விளைவுகள் பற்றியும் சொல்லியிருந்தார். அதைக் கேட்டவுடன் அந்த இளைஞர் பதற்றத்துக்கு உள்ளானார். மரண பயத்தினால் சாப்பிடாமல், பேசாமல் இருந்துவந்தார். அதனால்தான் மனநல ஆலோசனைக்கு அழைத்துவரப்பட்டிருந்தார்.