ஹாருகி முரகாமி 75: புதிய சாத்தியங்களைத் தேடும் கதைசொல்லி

ஹாருகி முரகாமி உலகம் முழுவதும் பிரபலமாக அறியப்படும் ஜப்பானிய எழுத்தாளர். நாவல்கள், சிறுகதைகள், கட்டுரைகள் என்று இவரது படைப்புகள் 50க்கும் மேற்பட்ட மொழிகளில் மொழியாக்கம் செய்யப்பட்டுள்ளன.

பூனைகளுடன் பேசும் முதியவர், இருவருக்கு மட்டும் புலப்படும் இரண்டு நிலவுகளைக் கொண்ட உலகம், காகத்தின் அசரீரியைப் பின்பற்றிச் செல்லும் இளைஞன், வானத்திலிருந்து பெய்யும் மீன் மழை, ஒரு நாள் நடுநிசிக் கனவில் சந்திக்கும் அதிர்ச்சிக்குப் பிறகு என்றென்றைக்கும் பேச்சுத் திறனை இழக்கும் சிறுவன், கனவில்நிகழும் உடலுறவில் நிஜத்தில் கருத்தரித்தல், ஒரு வாக்கியத்தையும் அடுத்த வாக்கியத்தையும் தொடர்புபடுத்தி வாசிக்க இயலாத டிஸ்லெக்ஸியா என்னும் வாசிப்புக்குறைபாடுடைய பெண் எழுதும் அபாயகரமான பின்னணி கொண்ட நாவல், தண்ணீரின் நெருக்கத்தை வைத்து ஆரூடம் கூறும் இளம்பெண், பெயர் அடையாளத்தைத் திருடிச் செல்லும் குரங்கு, புத்தகங்களைப் படித்தவரின் மூளையை உண்ணும் கிழவர், தொடர்ந்து பதினேழு நாள்களாகத் தூங்காமல் எவ்வித நோய் அறிகுறியுமின்றி விழிப்பில் இருக்கும் பெண் என்று முரகாமியின் புனைவுகளில் மையக்கதாபாத்திரத்தின் விதியைத் தீர்மானிப்பதில் விசித்திரமான குணாம்சங்கள் கொண்ட துணைக் கதாபாத்திரங்களும் சூழலும்முக்கியப் பங்காற்றுகின்றன.