தீர்க்கதரிசனப் பாடல்: மானுடத் துயரம்

கடந்த ஆண்டு புக்கர் பரிசு பெற்ற ஐரிஷ் எழுத்தாளர் பால் லிஞ்ச்சின் (Paul Lynch) ‘தீர்க்கதரிசனப் பாடல்’ (Prophet Song) நாவல், எந்த ஒரு நாட்டிலும் ஏற்படக்கூடிய நிலைமையை ஒரு குடும்பத்தின்கதை வழியாகச் சொல்கிறது. தென் அயர்லாந்தின் தலைநகர் டப்ளினில் வசிக்கும் லார்ரி ஸ்டேக், அந்நாட்டு ஆசிரியர்கள் சங்கத்தின் துணைத் தலைவர்; மனைவி எல்லிஷ் உயிரியல் தொழில்நுட்ப ஆராய்ச்சியாளர்; நான்கு குழந்தைகள்: மூத்தவன் மார்க். அவனுக்கு இன்னும் 17 வயது நிறைவடையவில்லை. மோல்லி 14 வயதுப் பெண். பெய்லி அவளைவிடச் சிறியவன். பென், கைக்குழந்தை. அலுவலக வேலை முடிந்தவுடன் வீட்டு வேலைகள், குழந்தைகள் பராமரிப்பு எல்லாமே எல்லிஷுடையவை. மகிழ்ச்சியான குடும்பம்.