நெல் விவசாயிகளைத் தண்டிக்காதீர்கள்!

இந்தியாவில் அனைத்துப் பகுதிகளிலும், எல்லாப் பருவங்களிலும் பயிரிடப்படும் பெரும் பயிர் நெல். அறுபதுகளின் நடுப்பகுதியில் பசுமைப் புரட்சி இந்தியாவில் அறிமுகப்படுத்தப்பட்டதற்குப் பிறகு, நெல் பயிரின் தன்மை உணவு தானியப் பயிரிலிருந்து பெரும் வணிகப் பயிராக மாறியுள்ளது.

ஏறக்குறைய 460 லட்சம் ஹெக்டேர் பரப்பளவில், நெல் பயிரிடுவதன் மூலம் கிடைக்கும் வருமானம், இந்தியாவின் பெரும்பான்மை விவசாயிகளின் வாழ்வாதாரமாகவும் உள்ளது. இருப்பினும், 2023ஆம் ஆண்டின் இரண்டாம் பாதியில் மத்திய அரசு அறிமுகப்படுத்திய பாஸ்மதி அல்லாத வெள்ளை அரிசி மீதான ஏற்றுமதி தடை, புழுங்கல் அரிசிக்கு விதிக்கப்பட்டுள்ள 20% ஏற்றுமதி வரி ஆகியவை நெல் சாகுபடியில் ஏற்கெனவே பல இன்னல்களை எதிர்கொண்டுள்ள விவசாயிகள் மத்தியில் பெரும் அதிர்ச்சியை ஏற்படுத்தியுள்ளது. நெல் சாகுபடி செய்பவர்கள் லாபம் ஈட்டுகிறார்களா? அரிசி ஏற்றுமதித் தடையால் விவசாயிகளுக்கு ஏற்பட்டுள்ள நஷ்டத்தை ஈடுகட்ட வேண்டாமா?