இடையிலாடும் ஊஞ்சல் - 12: திருநெல்வேலி எழுச்சி எதை உணர்த்தி நிற்கிறது?

அமைப்புகளால் அணிதிரட்டி நடத்தப்படும் போராட்டங்களாக அல்லாமல், மக்கள் தன்னெழுச்சியாகப் போராட வருவது உலக வரலாற்றில் புதிதல்ல. தமிழ்நாட்டில் ஜல்லிக்கட்டுப் போராட்டம், இலங்கை மக்கள் போராட்டம் என சமகாலத்திலும் நிறைய உதாரணங்கள் உண்டு.

ஆனால் 115 ஆண்டுகளுக்கு முன்னால், காலனி ஆதிக்கக் காலத்தில் தமிழ் மண்ணில் அப்படி ஒரு மக்கள் எழுச்சி நடந்துள்ளது என்பது பலருக்கும் தெரியாது. 1908 மார்ச் 13 அன்று திருநெல்வேலியில் அந்த எழுச்சி ஏற்பட்டது. ஆனால், அதை ‘திருநெல்வேலிக் கலகம்’ என்றே ஆங்கிலேயர் எழுதிவைத்தனர். மாபெரும் சிப்பாய்ப் புரட்சியையே ‘சிப்பாய்க்கலகம்’ என்று குறிப்பிட்டவர்கள் அல்லவா அவர்கள்!