ஆதரவற்றோர் மீதான கொடுமைகள்: அரசு என்ன செய்கிறது?

உடல்ரீதியாகவும் மனரீதியாகவும் பலவீனமான நிலையில், உதவிக்காகச் சக மனிதர்களைச் சார்ந்திருக்க வேண்டிய சூழலில் இருப்பவர்கள், அதே மனிதர்களால் கொடுமைப்படுத்தப்படுவதைவிடப் பேரவலம் என்ன இருக்க முடியும்? விழுப்புரம் மாவட்டம் குண்டலபுலியூரில் செயல்பட்டுவந்த அன்பு ஜோதி ஆசிரமத்தில் தங்கவைக்கப்பட்டிருந்தவர்களுக்கு நிகழ்த்தப்பட்ட கொடூரங்கள் இந்தக் கேள்வியைத்தான் எழுப்புகின்றன.

இந்த இல்லத்தில் தங்கவைக்கப்பட்டிருந்தவர்களில் மனநலம் பாதிக்கப்பட்டவர்கள், ஆதரவற்றவர்கள், முதியோர் எனப் பல தரப்பினரும் அடக்கம். இவர்களுக்கு இடையில் இருந்த ஒரே ஒற்றுமை, எல்லோருமே ஏதேனும் வகையில் வன்கொடுமைக்கு ஆளானவர்கள்தான்.