நீர் இருப்பு பற்றி வெளிவரும் செய்திகள் அச்சமூட்டுகின்றன. ஒருபுறம், எதிர்காலத்தில் பயன்படுத்தக்கூடிய நீர் வளங்கள் வேகமாகக் குறைந்துவருகின்றன. மறுபுறம் நீரின் தரம் மோசமடைந்து வருகிறது. உலக அளவில் நிலத்தடி நீரை உறிஞ்சுதல் ஆண்டுதோறும் 1% முதல் 2% வரை அதிகரித்துவருவதால் நிலத்தடி நீர் இருப்பும் குறைந்துவருகிறது. குளங்கள், ஏரிகள் ஆபத்தான வேகத்தில் மறைந்துவருகின்றன. நிலைமை இப்படியே சென்றால் எதிர்காலச் சந்ததியினருக்குத் தண்ணீர் கிடைக்குமா?
பிரச்சினையின் தீவிரம்: உலக வங்கி, யுனிசெஃப் உள்ளிட்ட சர்வதேச அமைப்புகள் வெளியிட்டுள்ள அறிக்கைகள், இன்று உலகளவில் நீர்ப் பற்றாக்குறை மிகவும் பெரிய சவாலாகவும், கோடிக்கணக்கான மக்களைத் தினமும் பாதித்துவருவதாகவும் கூறுகின்றன. மக்கள்தொகை அதிகரித்து நகரங்கள் தொடர்ந்து விரிவடைவதால், தண்ணீருக்கான தேவை வேகமாக அதிகரித்து வருகிறது.
இது ஏற்கெனவே வரையறுக்கப்பட்ட நீர் வளங்களின் (Potential Water) மீது பெரும் அழுத்தத்தை ஏற்படுத்துகிறது. உலகெங்கிலும் 200 கோடிக்கும் அதிகமான மக்கள் பாதுகாப்பான குடிநீர் கிடைக்காமல் தவிப்பதாகவும், சுமார் 400 கோடிக்கும் அதிகமான மக்கள் ஒவ்வோர் ஆண்டும் குறைந்தது ஒரு மாதத்துக்குக் கடுமையான நீர்ப் பற்றாக்குறையை எதிர்கொள்வதாகவும் தரவுகள் கூறுகின்றன. நீர் தொடர்பான மோதல்களின் எண்ணிக்கையும், தீவிரமும் அதிவேகத்தில் அதிகரித்து வருகின்றன.
இந்தியாவின் நிலை: நிதி ஆயோக் அமைப்பின் அறிக்கையான கூட்டு நீர் மேலாண்மைக் குறியீடு (Composite Water Management Index, 2018), ‘இந்தியா அதன் வரலாற்றில் மிக மோசமான நீர் நெருக்கடியைச் சந்தித்து வருகிறது’ எனக் கூறியுள்ளது. மேலும், ‘இந்தியாவில் சுமார் 60 கோடி மக்கள் அதி முதல் தீவிர (high-to-extreme) நீர் நெருக்கடியை எதிர்கொள்கிறார்கள். வரும் 2030ஆம் ஆண்டுக்குள் 40% மக்களுக்குக் குடிநீர் கிடைப்பதில் சிக்கல் ஏற்படும். 75% மக்களுக்கு அவர்கள் வீட்டில் குடிநீர் வசதி இல்லை.
70% தண்ணீர் மாசுபட்டுள்ளது மட்டுமல்லாமல், நீர்த் தரக் குறியீட்டில் 122 நாடுகளில் இந்தியா தற்போது 120ஆவது இடத்தில் உள்ளது’ என்று நிதி ஆயோக் அறிக்கை கூறியுள்ளது. மாசுபட்ட தண்ணீரை அருந்துவதால், இந்தியாவில் ஒவ்வோர் ஆண்டும் கிட்டத்தட்ட 2 லட்சம் பேர் உயிரிழக்கின்றனர் என்றும் குறிப்பிட்டு உள்ளது. பொருளாதார வளர்ச்சிக்கு நீர் அவசியம் என்பதால், நீர்ப் பற்றாக்குறை காரணமாக, வரும் 2050ஆம் ஆண்டுக்குள் மொத்த உள்நாட்டு உற்பத்தியில் (Gross Domestic Product) 6% இழப்பு ஏற்படும் என்று சில கணிப்புகள் குறிப்பிடுகின்றன.
மத்திய நீர் ஆணையத்தின் தரவுகளின்படி, சராசரியாக ஓர் ஆண்டுக்குப் பயன்படுத்தக்கூடிய இந்தியாவின் மொத்த நீர் வளம் (Utilisable Water) சுமார் 1,123 பில்லியன் கன மீட்டர். ஆனால், தண்ணீருக்கான தேவை 2050ஆம் ஆண்டுக்குள் 1,447 பிசிஎம் ஆக அதிகரிக்கும் என்று கணிக்கப்பட்டுள்ளது. அதாவது, நீர்த் தேவைக்கும் அதன் வழங்குதலுக்கும் இடையில் பெரிய இடைவெளி ஏற்படும். தொடர்ச்சியான நீர்ச் சுரண்டல் காரணமாக மொத்த நீர் வளங்களில் மட்டுமல்ல, தனிநபருக்குக் கிடைக்கும் நீரிலும் பெரும் சரிவு ஏற்பட்டு
உள்ளது. 2001இல் 1,816 கன மீட்டராக இருந்த தனிநபர் நீரின் அளவு, 2011இல் 1,544 ஆகவும், 2025இல் 1,434ஆகவும் குறையும் என்று கணக்கிடப்பட்டுள்ளது. தனிநபர் நீர் அளவு எங்கெல்லாம் 1,700 கன மீட்டருக்கும் கீழே உள்ளதோ, அங்கே தண்ணீர்ப் பஞ்சம் உள்ளதாக உலக அளவிலான தண்ணீர் மதிப்பீட்டுக் குறியீடுகள் கூறுகின்றன. நிலத்தடி நீர் முன்பைவிடத் தற்போது பெரும் நெருக்கடியில் உள்ளது.
ஓர் ஆண்டில் பயன்படுத்தக்கூடிய நிலத்தடி நீர் அளவான 397.62 பில்லியன் கன மீட்டரில் (BCM) தற்போது 244.92 பிசிஎம் உறிஞ்சப்படுகிறது. இது உலகிலேயே மிக அதிகம். விவசாயரீதியாக முன்னேறிய பெரும்பாலான மாநிலங்களில் (பஞ்சாப், ஹரியாணா, தமிழ்நாடு, கர்நாடகம்) நிலத்தடி நீர்ச் சுரண்டல் மிக அதிகமாக உள்ளது. மத்திய நிலத்தடி நீர் வாரியம் 2024இல் ஆய்வுசெய்த 6,746 வட்டங்களில், சுமார் 27% வட்டங்களில் நீர் அதிகமாக சுரண்டப்படுவதாகவும், மற்ற வட்டங்களில் நிலைமை வேகமாக மோசமடைந்து வருவதாகவும் தெரிவித்துள்ளது.
தீர்வுகள் என்ன? - 90% நீரைப் பயன்படுத்தும் விவசாயத்தில் நீர்ப் பயன்பாட்டைக் குறைப்பது முக்கியம். இந்தியாவில் கால்வாய்ப் பாசனம் சுமார் 180 லட்சம் ஹெக்டேர் பரப்பளவைக் கொண்டுள்ளது. ஆனால், நீர்க் கணக்கீட்டு முறை (Water Accounting Method) இல்லாததால், அங்கு நீர்ப் பயன்பாட்டுத் திறன் வெறும் 35 - 40% மட்டுமே உள்ளது. 2000இன் தொடக்கத்தில் நீர்க் கணக்கீட்டு முறையைக் கால்வாய்ப் பாசனத்தில் அறிமுகப்படுத்தியதன் மூலம், நீர்ப் பயன்பாட்டுத் திறனை மகாராஷ்டிரம் கணிசமாக அதிகரிக்க முடிந்தது.
கால்வாய்ப் பாசனத்தில் அளவீட்டு விலை (Volumetric Pricing) நிர்ணயத்துக்குப் பதிலாக, பரப்பளவு அடிப்படையில் நீருக்கு விலை நிர்ணயம் செய்வதால், நீரின் பயன்பாட்டுத் திறன் மிகவும் குறைவாக உள்ளது. பாசன நீர் விலை நிர்ணயம் குறித்த வைத்தியநாதன் குழு (1992) பரிந்துரைத்தபடி, அளவீட்டு முறையில் விலை நிர்ணயம் செய்தால், கால்வாய்ப் பாசனப் பகுதியில் நீரின் செயல்திறனை மேம்படுத்துவதோடு, கால்வாய்ப் பாசனப் பகுதிகளில் தற்போதுள்ள நீர்ப் பற்றாக்குறையைக் கணிசமாகக் குறைக்கலாம்.
நீர்ப் பயன்பாட்டுத் திறனை அதிகரிப்பதற்கு ஒரு நம்பிக்கைக்குரிய தீர்வு நுண் நீர்ப்பாசனம் (drip and sprinkler irrigation method). இந்தியாவின் பல பகுதிகளில் நடத்தப்பட்ட கள ஆய்வுகள், இந்த முறை மூலமாக 50-70% நீர், மின்சாரத்தைச் சேமிப்பதோடு பயிர் விளைச்சலைக் கணிசமாக அதிகரிக்க முடியும் என்பதைக் காட்டுகின்றன. நுண் நீர்ப்பாசனத்துக்கான பணிக்குழு (Task Force on Micro-Irrigation, 2014), இத்தகைய தொழில்நுட்பத்தைப் பயன்படுத்துவதன் மூலம் பல்வேறு பயிர்களில் அடையக்கூடிய மிகப்பெரிய நீர்ச் சேமிப்பை அடிக்கோடிட்டுக் காட்டியுள்ளது.
மகாராஷ்டிரம், குஜராத், ஆந்திரம் போன்ற மாநிலங்கள் நுண் நீர்ப்பாசனத்தைப் பயன்படுத்துவதில் விரைவான முன்னேற்றம் அடைந்துள்ளன. தற்போதுள்ள (2023-24) நுண்பாசனப் பரப்பளவான 167.35 லட்சம் ஹெக்டேரை மேலும் விரிவுபடுத்துவதன் மூலம், நீர்ப்பயன்பாட்டுத் திறனை அதிகரிப்பதோடு, நிலத்தடி நீர்ச் சுரண்டலையும் குறைக்க முடியும்.
ஒருங்கிணைந்த முயற்சிகள் தேவை: நெல், கோதுமை, கரும்பு, வாழை போன்ற அதிக நீர் உறிஞ்சும் பயிர்களின் சாகுபடிப் பரப்பளவு அதிகரித்துவருவது, நீர்ப் பற்றாக்குறையை அதிகரிக்கிறது. இந்தியாவில் 1990-91 முதல் 2020-21 வரையிலான காலக்கட்டத்தில், நீரை அதிகம் உறிஞ்சும் கரும்புப் பயிரின் சாகுபடிப் பரப்பளவு 32 சதவீதமும், நெல்லின் பரப்பளவு 6 சதவீதமும், வாழையின் பரப்பளவு 129 சதவீதமும் அதிகரித்துள்ளது. இதைச் சரிசெய்யக் குறைந்த நீர் உறிஞ்சும் பயிர்களுக்குக் குறைந்தபட்ச ஆதரவு விலையை உயர்த்தி, அதன் கொள்முதல் உள்கட்டமைப்பு வசதிகளை அதிகரிக்க வேண்டும்.
அதிகரித்துவரும் தண்ணீர்ப் பற்றாக்குறை மாநிலங்களுக்கு இடையேயும், மாவட்டங்களுக்கு இடையேயும் மோதல்களை ஏற்படுத்துவது மட்டுமல்லாமல், தண்ணீர் வழங்குவதற்கான செலவையும் சேர்த்தே அதிகரிக்கிறது. நீர்த்தேவை சார்ந்த பிரச்சினைகளைச் சரிசெய்யும் அதே வேளையில், நீர் இருப்பை அதிகரிக்க குளம், ஏரி போன்றவற்றை மீட்டெடுப்பதற்கும் புதுப்பிப்பதற்கும் ஒருங்கிணைந்த முயற்சிகள் தேவை.
- தொடர்புக்கு: narayana64@gmail.com
மார்ச் 22 - உலக தண்ணீர் தினம்