அதிர்வுகளை ஏற்படுத்திய அரசியல் தலைவர் ஈ.வி.கே.எஸ். இளங்கோவன் | அஞ்சலி

ஈ.வி.கே.எஸ்.இளங்கோவன் - தமிழ்நாட்டு அரசியல் களத்தின் முக்கிய முகங்களுள் ஒருவராக அறியப்பட்டவர். பெரியாரின் பேரன் – ஈ.வெ.கி.சம்பத்தின் மகன் என்கிற இருபெரும் அடையாளங்களுக்குச் சொந்தக்காரர். தமிழ்நாடு காங்கிரஸின் தவிர்க்க முடியாத தலைவர்களுள் ஒருவராக இருந்தவர். காங்கிரஸை உயிர்ப்புடன் வைத்திருந்த அவரது மறைவு தமிழக அரசியல் களத்துக்குப் பெரும் இழப்பு.

அரசியல் பயணம்: ஆரம்ப காலம் முதலே அரசியல் காற்றைச் சுவாசித்து வளர்ந்தவர் என்பதால் இளங்கோவனின் அரசியல் பயணம் வெகு இயல்பானதாக இருந்தது. தனது தந்தையின் பாதையில் காங்கிரஸ் உறுப்பினராகி அரசியலில் தீவிரம் காட்டினார். நடிகர் சிவாஜி கணேசனின் ரசிகரான இளங்கோவன், கட்சிக்குள்ளும் சிவாஜி ஆதரவாளராகவே அறியப்பட்டார்.