பேராசிரியர் பணியிட மாறுதல்: மாணவர் நலனிலும் கவனம் வேண்டும்

தங்களுக்குப் பணியிட மாறுதல் பல ஆண்டுகளாக வழங்கப்படவில்லை என அரசுக் கல்லூரிப் பேராசிரியர்கள் தொடர்ச்சியாக முறையிட்டு வரும் சூழலில், தமிழக அரசின் உயர் கல்வி அமைச்சகம் அதற்காக விரைவில் இணையவழிக் கலந்தாய்வு நடத்தப்போவதாக அறிவித்திருப்பது வரவேற்புக்குரியது. அதேவேளையில், அதைச் செயல்படுத்தும்போது மாணவரின் நலன் பாதிக்கப்பட வாய்ப்பு உள்ளது என்கிற கல்விச் செயல்பாட்டாளர்களின் கருத்தும் புறக்கணிக்க இயலாதது.

தமிழகத்தில் 171 அரசு கலை - அறிவியல் கல்லூரிகள் உள்ளன. அரசுக் கல்லூரிகளில் உள்ள 13,000 பணியிடங்களில் 4,500 பணியிடங்களில் மட்டுமே நிரந்தரப் பேராசிரியர்கள் இருப்பதாகவும் மீதமுள்ள 8,500 இடங்களில் கௌரவப் பேராசிரியர்கள் பணிபுரிவதாகவும் தமிழ்நாடு கல்லூரி ஆசிரியர் சங்கம் கூறுகிறது.