நூல் வெளி: மாயமும் யதார்த்தமும்

குமரி மாவட்டம் என்றவுடன் டவுன், ஃபோர் ரூட், கல்குளம், விளவங்கோடு, கடப்புரம் என எல்லாவற்றையும் ‘நாஞ்சில்’ என ஒரே கட்டாகக் கட்டிச் சாக்கில் போட்டுவிடுவார்கள். யதார்த்தத்தில் இதற்குள்ளும் வேறுபட்ட வாழ்க்கையும் பண்பாடுகளும் இருக்கின்றன. கன்னியாகுமரி மேற்குப் பகுதியின் தனித்துவமான வாழ்க்கையை நட.சிவகுமார் ‘பஞ்சவர்ண குகை’ கதைத் தொகுப்பில் பதிவுசெய்துள்ளார்.

சலவைத் தொழில் சார்ந்த மக்களின் வாழ்க்கையை இந்தத் தொகுப்பு பேசுகிறது. அவர்களின் கொண்டாட்டம், வாழ்க்கைப் பிரச்சினைகள், நம்பிக்கைகள், தொன்மங்கள் எனப் பல அம்சங்கள் யதார்த்தமாகச் சொல்லப்பட்டுள்ளன. அடித்தட்டு மக்களின் வாழ்க்கை என்றதும் உப்பையும் புளியையும் சிவகுமார் கூட்டிவிடவில்லை. சலவைச் சமூகத்தைச் சேர்ந்த இளைஞர் தெய்வ வாகனத்தை தூக்குவது பற்றிய ‘கேரளபுரம்’ கதையை இதற்கு உதாரணமாகச் சொல்லலாம்.