நூல் வெளி: ஊரும் பேரும்

‘பாண்டிய நாட்டு ஊர்களின் வரலாறு’ என்கிற நூல் முனைவர் வெ.வேதாசலம் எழுதியதாகும். ஊர்கள், அவற்றின் அமைப்பு முறை, பிரம தேயங்கள் எவ்வாறு தோன்றின, வணிக நகரங்களாகிய பட்டினம், பட்டணம் எவ்வாறு காலூன்றின, படை வீரர்களுக்கான படைப்பற்று எவ்வாறு உதித்தன, அவற்றின் வளர்ச்சியும் பெயர்களும் எவ்வாறு அமைந்தன, எவ்வாறு முன்னொட்டு, பின்னொட்டு கொண்டு விளங்கின என்பன போன்றவற்றை வேதாசலம் விரிவாக இந்நூலில் விளக்கியுள்ளார். மேலும் இவ்வகையான குடியேற்றங்கள் எப்படி நிலவுடைமையை அடிப்படையாகக் கொண்டு விளங்கின, எப்படி வரிகள் வசூலிக்கப்பட்டன என்பவை பற்றியும் விளக்கியுள்ளார்.